Y frech goch: Dau achos newydd

Mae 341 o achosion wedi eu cofnodi yng Nghymru

Daeth cadarnhad bod 'na ddau achos newydd o'r frech goch wedi eu cadarnhau yng Nghymru.

Mae un ym Mhowys ac un yn Sir Benfro.

Ar hyn o bryd mae achosion yn 17 o'r 22 sir yng Nghymru.

Erbyn hyn cafwyd 341 o achosion, y mwyafrif ohonyn nhw'n blant.

O'r rhain mae 262 yn y gorllewin a'r canolbarth, 58 yn y gogledd a 21 yn y de-ddwyrain.

Mae 41 person wedi cael triniaeth ysbyty.

Dywedodd Gwasanaeth Iechyd Cyhoeddus Cenedlaethol Cymru fod achosion ardal Llandudno "o dan reolaeth".

Clwy'r pennau

Mae'r gwasanaeth yn annog rhieni i drefnu pigiad MMR i'w plant.

Hefyd mae nifer achosion y clwy'r pennau'n codi.

Achosion y frech goch Caerfyrddin: 85 Abertawe: 69 Conwy: 53 Sir Benfro: 39 Castell-nedd Port Talbot: 36 Pen-y-bont ar Ogwr: 25 Torfaen: 9 Powys, Rhondda Cynon Taf a Blaenau Gwent: 5 yr un Ceredigion: 3 Wrecsam: 2 Siroedd Fflint, Dinbych, Gwynedd, Caerdydd a Merthyr Tudful: 1 yr un Gwybodaeth Gwasanaeth Iechyd Cyhoeddus Cenedlaethol Cymru, 5pm, Gorffennaf 2, 2009

Yn 2008 roedd 329 o achosion yng Nghymru ond dywedodd y Gwasanaeth Iechyd fod 543 o achosion wedi eu cadarnhau ers Ionawr 1 eleni.

"Erbyn hyn, mae achosion bron iawn ym mhob un o siroedd Cymru," meddai Dr Marion Lyons, Pennaeth Tîm Gwarchod Iechyd Cyhoedd y Gwasanaeth Iechyd Cyhoeddus.

"Bob dydd mae nifer yr achosion yn dal i godi ac rydyn ni'n dal i boeni am unrhyw un sydd heb gael dau ddogn o'r brechiad MMR.

"Mae'r brechiad yn saff, yn effeithiol a'r unig amddiffyniad yn erbyn y frech goch.

Difrifol

"Hefyd mae'n amddiffyniad yn erbyn clwy'r pennau sydd ar gynnydd yng Nghymru."

Dywedodd fod y ddau glefyd â sgileffeithiau difrifol.

"Mae modd i blant gael niwed ar yr ymennydd neu farw o'r frech goch ac mae cymhlethdodau clwy'r pennau yn gallu cynnwys llid yr ymennydd a cholli clyw.

"Y rhai sy fwya mewn perygl o ddal y frech goch yw plant ysgol sydd ddim wedi cael dau ddogn o'r MMR neu blant rhwng 1 a 3 oed na chafodd y brechiad cyntaf yn 13 mis oed.

"Rydyn ni'n amcangyfri bod 45,000 o blant ysgol mewn perygl o ddal y frech goch ar hyn o bryd."

Rhif cyswllt Galw Iechyd Cymru yw 0845 46 47.