Criced: Dyfarnwr yn marw

Roedd Mr Jenkins yn ddyfarnwr am 25 mlynedd

Mae dyfarnwr criced wedi marw ar ôl cael ei daro yn ei ben gan bêl yn ystod gêm ar faes San Helen yn Abertawe ddydd Sadwrn.

Roedd Alcwyn Jenkins , 72 oed, yn dyfarnu gêm rhwng Abertawe a Llangennech pan ddigwyddodd y ddamwain.

Roedd Mr Jenkins yn ŵr gweddw o Sgiwen ger Castell-nedd.

Dywedodd Neil Hobbs, cadeirydd anrhydeddus Cymdeithas Criced De Cymru, ei bod yn ddamwain drasig.

"Dwi wedi dyfarnu gydag Alcwyn - bachan hyfryd.

"Roedd parch mawr ato yn y gynghrair, ac roedd pawb yn nabod Alcwyn," meddai Mr Hobbs.

"Roedd e'n ddyfarnwr am 25 mlynedd fwy neu lai.

"Mae'n ddiwrnod trist iawn a dwi'n teimlo trueni dros ei blant.

"Bydd colled fawr ar ei ôl".

Taith

Dywedodd Steve Davies, cadeirydd Clwb Criced Abertawe, bod y ddamwain wedi digwydd tua 4pm o flaen torf anarferol o fawr gan fod llawer o'r gynulleidfa wedi bod yn gwylio gêm rygbi'r Llewod yn erbyn De Affrica cyn hynny.

Ychwanegodd Mr Davies bod Mr Jenkins wedi dweud wrtho cyn y gêm: "Dwi wrth fy modd yn chwarae yn San Helen. Mae'n lle gwych i chwarae criced."

Roedd Mr Jenkins wedi dychwelyd yn ddiweddar o daith i India'r Gorllewin gyda Chymdeithas Criced De Cymru.

Dywedodd Heddlu De Cymru bod dyn 72 oed wedi marw mewn gêm griced yn Abertawe ac nad oedd amgylchiadau amheus.