British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Sadwrn, 4 Gorffennaf 2009, 09:19 GMT 10:19 UK
Aliwminiwm: Tasglu yn cyfarfod

Aliwminiwm Môn
Y cwmni: Un o gyflogwyr mwya'r gogledd

Mae grŵp sydd wedi cael ei sefydlu i geisio rhoi cymorth i weithwyr Aliwminiwm Môn wedi cyfarfod am y tro cyntaf yng Nghaergybi ddydd Gwener.

Mae'r tasglu yn cynnwys cynrychiolwyr o'r cwmni ei hun, Cyngor Môn ac undebau'r gweithwyr.

Yn ôl llefarydd ar ran y tasglu, bu'r cyfarfod yn "adeiladol iawn".

Dywedodd arweinydd Cyngor Ynys Môn, Clive McGregor, bod y tasglu yn "edrych ar bob math o gronfeydd ariannol er mwyn helpu'r gweithwyr yn y gymuned leol i ailhyfforddi".

Daeth y cyhoeddiad fod 140 o weithwyr yn cael cynnig diswyddiadau gwirfoddol yno ddiwrnod ar ôl i'r cwmni wrthod help ariannol o bron £50 miliwn oddi wrth y llywodraeth.

Roedd Mr McGregor, wedi dweud wrth BBC Cymru ei fod yn siomedig fod y penaethiaid wedi gwrthod y cymorth £48 miliwn am bedair blynedd.

A dywedodd y rheolwyr nad oedd y pecyn yn ddigon.

Mae cytundeb y cwmni â gorsaf bŵer niwclear Yr Wylfa i gael trydan rhad yn dod i ben ym mis Medi.

Dywedodd swyddogion undebau fod y cwmni angen mwy na dwbl yr arian oedd yn cael ei gynnig.

Mae'r gwaith yng Nghaergybi yn cyflogi bron 500 o bobl.

Poeni

Dydd Iau dywedodd y cwmni y byddai 140 o weithwyr yn gadael oherwydd nad ydyn nhw wedi gallu cael cytundeb digonol am drydan rhad.

Mae staff oedd eisiau gadael wedi gwneud cais am ddiswyddiad gwirfoddol ac fe fyddan nhw'n cael gwybod a yw eu cais wedi ei dderbyn ddydd Gwener.

Mae trafodaethau yn parhau i ddod o hyd i drydan rhad i'r cwmni.

Ond dywedodd Mr McGregor ei fod yn poeni am ddyfodol y safle ac yn ofni y byddai'r gwaith yn cau ym mis Medi.

"Mae'n siom enfawr fod cymaint o swyddi yn y fantol a bod y cwmni ar hyn o bryd yn gwrthod yr arian sydd ar gael.

"Ond mae 'na obaith o hyd ... dydi'r drws ddim wedi cau ac mae'r cwmni yn dal i drafod.

"Ond rydan ni'n paratoi ar gyfer nifer sylweddol yn wynebu colli eu gwaith."

Pe bai cytundeb yn cynnig trydan ar yr un telerau â'u cytundeb presennol, byddai dyfodol y safle yn ddiogel, meddai rheolwr gyfarwyddwr y cwmni, David Bloor.

'Gwneud elw'

"Does 'na neb wedi dod aton ni i gynnig trydan rhad gan fod modd iddyn nhw werthu trydan ar y farchnad am bris llawn a gwneud elw."

Ychwanegodd nad oedd eisiau codi gobeithion gweithwyr drwy ymddangos eu bod yn aros am fwy o arian gan y llywodraeth.

"Mae'r cynnig sydd wedi cael ei wneud yn hael iawn ac rydan ni'n diolch i'r llywodraeth am eu hymdrechion.

"Ond dwi ddim yn meddwl ein bod ni mewn sefyllfa lle'r rydan ni'n gofyn am ychydig mwy o arian er mwyn ennill tir a llwyddo," meddai.

"Mae'r bwlch yn sylweddol ac mae'n rhaid bod yn realistig ... dwi ddim yn meddwl bod hyn yn mynd i ddigwydd."



HEFYD
Alwminiwm: Pecyn cymorth £48m
01 Gorff 09 |  Newyddion
Aliwminiwm: Gorsaf bwer?
16 Meh 09 |  Newyddion
'Pryder am 500 o swyddi'
15 Ion 09 |  Newyddion

CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific