Lladrad arfog: Carcharu dyn

Fe ddihangodd o Lys y Goron Yr Wyddgrug

Mae dyn 36 oed o Ynys Môn sy'n euog o ladradau arfog wedi ei anfon i'r carchar am gyfnod amhenodol.

Dywedodd y barnwr yn Llys y Goron Caer wrth Gareth Siarl Williams y byddai rhaid iddo fod dan glo am o leiaf bedair blynedd a hanner.

Roedd y diffynnydd o Fodffordd wedi dianc o Lys y Goron, Yr Wyddgrug, ddeuddydd cyn y Nadolig ar ôl dal swyddog carchar yn gaeth.

Ar y pryd roedd ar fin cael ei ddedfrydu.

Roedd wedi ei arestio ym mis Tachwedd yn Lerpwl.

Fe blediodd yn euog i ddwyn arian oddi wrth is-swyddfeydd post yn Llanddaniel, Ynys Môn, ar Hydref 24, Llanarmon-yn-Iâl ger Yr Wyddgrug ar Hydref 31 a swyddfa bost yn Ashton ger Caer ar Hydref 8.

Cyfanswm yr arian gafodd ei ddwyn oedd £11,500.

Bob tro roedd wedi bygwth isbostfeistres â chyllell fawr.

Bydd hefyd yn cael ei ddedfrydu ar ôl pledio'n euog i bum cyhuddiad o dwyll.