Prifathro: Carchar am ddwy flynedd

Thorley: Yn euog o naw cyhuddiad

Mae prifathro oedd yn euog o naw cyhuddiad o ymosod yn rhywiol ar blant wedi cael dwy flynedd o garchar.

Yn Llys y Goron Abertawe ym mis Mai fe gafwyd David Thorley, 56 oed o Gaerfyrddin, yn euog.

Fe'i cafwyd yn ddieuog o ddau gyhuddiad.

Roedd wyth o'r 19 cyhuddiad gwreiddiol wedi eu tynnu'n ôl am fod y barnwr wedi dweud nad oedd y dystiolaeth yn "ddigonol".

Dywedodd y Barnwr Michael Burr wrth y diffynnydd y byddai hanner ei ddedfryd yn y carchar cyn y byddai'n cael ei ryddhau ar drwydded.

Roedd yr erlyniad wedi dweud fod ei ddiddordeb mewn merched ifanc yn "afiach".

Honnodd yr erlyniad ei fod wedi cam-ddefnyddio ei swydd mewn ysgol yn Sir Benfro wrth archwilio'r plant yn fanwl a rhoi meddyginiaeth yn "gwbl amhriodol".

Dyletswydd

Pan gafodd ei holi gan yr heddlu dywedodd Thorley fod dyletswydd arno o dan y Ddeddf Gwarchod Plant i roi'r "driniaeth orau bosib" i'r plant.

Dywedodd ei fod yn sicrhau bod aelod benywaidd o staff o hyd yn bresennol.

Roedd y diffynnydd wedi dweud wrth y rheithgor fod yr achos yn "drasiedi bersonol" iddo ac wedi "torri calonnau" ei deulu.

Wrth gael ei groesholi, dywedodd Thorley fod yr ysgol yn "lle hyfryd lle oedd plant a staff gwych".

"Rwy'n falch iawn o'r ysgol," meddai.

Pan ofynnodd yr erlynydd iddo pam bod merched ffrind teuluol wedi gwneud honiadau amdano, fe soniodd am "ddylanwadau mileinig".