Diwrnod y Lluoedd Arfog i Gymru

Aelodau'r lluoedd arfog yn ymuno ac yn gorymdeithio drwy ganol Caerdydd ar Ddiwrnod y Lluoedd Arfog

Am y tro cyntaf mae Diwrnod y Lluoedd Arfog yn cael ei ddathlu ddydd Sadwrn gyda digwyddiadau a seremoni arbennig yng Nghymru.

Yn ystod y dydd fe gyhoeddwyd y bydd y prif ddigwyddiad cenedlaethol y flwyddyn nesaf yn cael ei gynnal yng Nghaerdydd.

Ym Mharc Biwt, Caerdydd dydd Sadwrn cafwyd seremoni ac arddangosfa hedfan oedd yn cynnwys awyren Spitfire a pherfformiad gan y Red Devils hefyd.

Mae'r diwrnod yn cymryd lle diwrnod y cyn-filwyr gyda'r nod o gefnogi milwyr sy'n gwasanaethu ar hyn o bryd yn ogystal â chofio'r cyn-filwyr.

Roedd miloedd o bobl yng Nghaerdydd i fod yn rhan o'r digwyddiadau a oedd yn cynnwys perfformiadau gan fandiau'r lluoedd arfog ac arddangosfeydd milwrol.

Bu cyn-filwyr yn gorymdeithio drwy'r ddinas ac mae digwyddiadau eraill wedi cael eu cynnal ar draws Cymru.

Er mai yn Nociau Hanesyddol Chatham yng Nghaint yr oedd y prif ddigwyddiad cenedlaethol eleni dywedodd Arglwydd Faer Caerdydd, y Cynghorydd Brian Griffiths, bod y digwyddiadau yn y ddinas yn rhai pwysig iawn.

'Braint arbennig'

"Fe fydd Diwrnod y Lluoedd Arfog yng Nghaerdydd yn cyfrannu i ddealltwriaeth ehangach o gymuned y lluoedd arfog ac o'r rôl allweddol y mae'n chwarae yn ein bywyd cenedlaethol ac i'r gwŷr a'r gwragedd arbennig, sy'n gwasanaethu ac wedi gwasanaethu, sydd yng nghalon y cyfan," meddai.

Wrth dderbyn y gwahoddiad i gynnal y prif ddathliadau'r flwyddyn nesaf dywedodd bod hi'n "fraint ac yn anrhydedd" i Gaerdydd gynnal y digwyddiad yn 2010.

"Fe fydd cynnal y diwrnod y flwyddyn nesaf yn rhoi cyfle i Gaerdydd a Chymru gyfan ddangos ein cefnogaeth i'r dynion gwŷr a'r gwragedd dewr sydd, nid yn unig wedi ond sy'n dal i'n gwrachod a gwasanaethu'r wlad heddiw.

Fe fydd y prif ddigwyddiad yn 2010 yn cael ei gynnal yng Nghaerdydd

"Mae gan Gymru hanes milwrol cryf ac mae 3ydd Bataliwn Catrawd y Cymry Brenhinol a'u cartref yng Ngwersyll Maindy yn y ddinas.

"Mae trefniadau eisoes wedi cychwyn i sicrhau y bydd hi'n ddiwrnod y bydd Cymru a'r DU yn falch ohoni."

Cafodd y diwrnod ei sefydlu i gydnabod gwaith a dewrder yr aelodau sy'n gwasanaethu, y cyn-filwyr a'r holl deuluoedd.

Fe wnaeth Prif Weinidog y DU, Gordon Brown, roi ei gefnogaeth i'r diwrnod y llynedd gan ddweud y dylai fod yn "ddiwrnod o arbennig o ddathlu".

Mae 'na gefnogaeth hefyd wedi bod i'r diwrnod gan brif swyddogion milwrol a theuluoedd milwyr sydd wedi marw mewn rhyfeloedd.

Roedd 'na ddigwyddiadau yn cael eu cynnal ym Mhontypridd, Pen-y-bont ar Ogwr, Tredegar, Cas-gwent, Hwlffordd, Caernarfon a Rhuddlan hefyd.

Yn ystod 2010 fe fydd Castell Caerdydd yn agor amgueddfa newydd, Amgueddfa'r Milwyr Cymreig.