British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Gwener, 19 Mehefin 2009, 05:30 GMT 06:30 UK
Airbus: Hwb o £28 miliwn

Airbus ym Mrychdyn
Mae Airbus wedi cael grant o dros £28 miliwn

Mae'r cwmni sy'n cynhyrchu awyrennau Airbus wedi cael grant o dros £28 miliwn gan Lywodraeth Cynulliad Cymru er mwyn sicrhau dyfodol creu adenydd awyren yn y ffatri yn Sir y Fflint.

Caiff yr arian ei roi i'r safle ym Mrychdyn, gan greu canolfan newydd er mwyn cynhyrchu math newydd o adenydd.

Dywedodd Brian Fleet, o Airbus, ei fod yn galluogi'r cwmni i edrych ymhellach na "sialensiau anodd y wasgfa ariannol bresennol".

Dywedodd Prif Weinidog Cymru y byddai'r cyllid yn gwarantu dyfodol Airbus yng Nghymru am flynyddoedd, "os nad degawdau".

Ychwanegodd Rhodri Morgan: "Heddiw gallwn ddathlu buddsoddiad enfawr sy'n gwarantu partneriaeth Airbus â Chymru am flynyddoedd, os nad y degawdau sydd i ddod.

"Mae Airbus yn rhan hanfodol o economi Cymru.

"Mae'r buddsoddiad hwn - a'r symudiad tuag at gynhyrchu adenydd awyren cyfansawdd - yn ategu ein henw da fel gwlad sydd â sgiliau uchel a chynnyrch o'r safon gorau."

Safle ecogyfeillgar

Daeth y cyhoeddiad dri mis yn unig wedi i Airbus gyhoeddi ei fod yn bwriadu colli 250 o swyddi ar safle Brychdyn, sy'n cyflogi mwy na 6,000 o bobl.

Ar y pryd dywedodd Llywodraeth Cynulliad Cymru er bod hyn yn "siomedig" yr oedd yn "galonogol" bod y cwmni yn bwriadu osgoi diswyddiadau gorfodol.

Dywedwyd wrth yr undebau bod y diswyddiadau yn ganlyniad i niferoedd llai o archebion, yn benodol ar gyfer y jet fusnes Hawker.

Bwriad y pecyn cyllid a gyhoeddwyd ddydd Gwener fydd datblygu technoleg creu adenydd cyfansawdd a ddefnyddir yn y genhedlaeth nesaf o awyrennau.

Bydd yn creu safle ecogyfeillgar ar gyfer adeiladu'r adenydd ym Mrychdyn.

Dywedodd Llywodraeth y Cynulliad hefyd y byddai'r cyllid yn "creu sgiliau'r dyfodol a chryfhau rôl Cymru fel canolfan o ddiwydiannau uwch-dechnoleg".

Dywedodd Ieuan Wyn Jones, Dirprwy Brif Weinidog Cymru: "Nid mater yn unig yw hyn o ddatblygu sgiliau a diogelu swyddi pobl sgilgar, er pwysiced wrth gwrs yw hynny.

"Mae'n fater o gyflwyno technoleg newydd fydd yn rhoi Cymru a'r Deyrnas Unedig ar flaen y gad ym maes technoleg newydd."



HEFYD
Airbus: Osgoi colli swyddi?
07 Mai 09 |  Newyddion
Bygythiad i swyddi Airbus?
19 Meh 08 |  Newyddion
Airbus: Trosglwyddo'r awyren fawr
15 Hyd 07 |  Newyddion

CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific