Patagonia: Cyfarfod yn fuan

Cafodd Evelyn Calcabrini ei hanfon yn ôl i'r Wladfa

Mae Gweinidog Swyddfa Cymru Wayne David a'r Ysgrifennydd Gwladol Peter Hain wedi addo cyfarfod â swyddogion y Swyddfa Gartref yn fuan i drafod achos menyw o Batagonia.

Dywedodd Mr David ei bod hi'n "bwysig bod cysylltiadau diwylliannol rhwng Cymru a Phatagonia yn cael eu datblygu ..."

Roedd Evelyn Calcabrini, 20 oed, yn bwriadu aros â theulu yng Nglyndyfrdwy, Sir Ddinbych, er mwyn gloywi ei Chymraeg a dysgu Saesneg.

Ond ar ôl i swyddogion mewnfudo ei holi ym Maes Awyr Heathrow cafodd ei hanfon yn ôl i Dde America.

Roedd Elfyn Llwyd AS wedi dweud bod swyddogion mewnfudo wedi ymddwyn "yn gywilyddus" ar ôl anfon y fenyw yn ôl i Batagonia.

Roedd y fenyw wedi cael gwahoddiad i aros yng nghartre Eos Griffiths a'i wraig o Batagonia, Carina.

"Roedd hi wedi dod yma i loywi ei Chymraeg ac i ddysgu Saesneg," meddai Mr Llwyd.

'Holi'n dwll'

Mae'n debyg iddi deithio 20 awr o'r Wladfa i Buenos Aires cyn taith 15 awr i Heathrow.

Dywed Elfyn Llwyd fod swyddogion wedi ymddwyn yn gywilyddus

"Mi gafodd ei holi'n dwll fel petai'n rhywfath o droseddwraig gan dri pherson ar wahân," meddai Mr Llwyd.

"Dwi ddim yn siwr faint o Sbaeneg yr oedden nhw'n ei deall.

"Ai dyma'r math o groeso mae pobl Y Wladfa yn ei gael?

"Mae o'n warthus o beth a dwi'n siwr y bydda fo ddim yn digwydd yng Nghymru."

Dywedodd llefarydd ar ran Asiantaeth y Ffiniau fod yna reolau caeth yn ymwneud â phobl sydd am ddod yma i aros am gyfnod.

"Rhaid iddyn nhw gwrdd â'r gofynion.

"Os nad yw hyn yn digwydd bydd mynediad yn cael ei wrthod.

"Mae'r system yn gadarn a theg."