'Dylai Brown fynd,' medd Flynn

Dywed Paul Flynn fod y prif weinidog wedi bod yn 'amddiffynnol ac amhenderfynol'

Mae Aelod Seneddol amlwg yn y Blaid Lafur Cymreig wedi galw ar y Prif Weinidog i adael ei swydd.

Dywedodd aelod Gorllewin Casnewydd, Paul Flynn, nad oedd Gordon Brown wedi bod yn ddigon pendant wrth ddelio â helytion treuliau Aelodau Seneddol.

Ond daeth cefnogaeth i'r Prif Weinidog gan Wayne David, Gweinidog yn y Swyddfa Gymreig, a'i ddisgrifiodd fel y person gorau i arwain y wlad.

Ddydd Iau, wrth adael y cabinet, fe wnaeth yr Ysgrifennydd Gwaith a Phensiynau, James Purnell, annog Mr Brown i ymddiswyddo.

'Lleiafrif bach'

Dywedodd Mr David wrth raglen Dragon's Eye BBC Cymru fod Mr Purnell yn rhan o "leiafrif bach a dethol", a bod y mwyafrif distaw o fewn y blaid Lafur seneddol yn dal i gefnogi'r prif weinidog.

Ychwanegodd ei fod yn gwbwl sicr mai Mr Brown fyddai'n arwain y blaid i'r etholiad cyffredinol nesaf.

Mae ganddo'r polisïau, y perspectif a'r cryfder i fynd â ni ymlaen Wayne David AS Llafur, Caerffili

"Does dim amheuaeth mai ef yw'r person gorau i arwain y wlad. Mae nifer fawr o weinidogion a nifer fawr o aelodau'r blaid Lafur seneddol yn gadarn y tu cefn i Gordon Brown," ychwanegodd.

"Mae ganddo'r polisïau, y persbectif a'r cryfder i fynd â ni ymlaen."

Ond dywedodd Mr Flynn ei fod yn gobeithio y byddai Mr Brown yn derbyn "barn mwyafrif y blaid Lafur seneddol, ac y byddai'n "gadael yn drefnus a chyflym."

"Mae e wedi bod yn araf, yn amddiffynnol ac ddim yn ddigon penderfynol ynglŷn â mater treuliau.

"Mae yna farn eang yn y blaid seneddol nawr yn galw am newid," ychwanegodd Mr Flynn.

Beirniadaeth am dreuliau

Dywedodd Dai Havard, AS Llafur Merthyr Tudful a Rhymni, y byddai'n rhaid i enwau mwy na James Purnell adael y cabinet cyn y byddai Mr Brown yn mynd.

"Fe fydd hi'n gyfnod diddorol dros y dyddiau nesa," meddai, "ond dwi'n meddwl y bydd yn rhaid i rai o'r enwau mawr fynd cyn i Gordon Brown adael ei swydd."

"Pe bai'r Arglwydd Mandelson yn symud er enghraifft, pwy a ŵyr?"

Dywedodd AS Llafur Aberafan, Hywel Francis, ei fod yntau 100% tu ôl i Gordon Brown.

Ychwanegodd ei fod wedi derbyn e-bost fore Gwener oedd yn ymddangos fel rhan o ymgyrch yn erbyn y prif weinidog, ond nad oedd wedi ei arwyddo, a'i fod yntau yn gwbwl gefnogol i Mr Brown.