British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Mercher, 3 Mehefin 2009, 16:08 GMT 17:08 UK
Pryder am wefan Golwg360

Gwefan Golwg360
Cafodd y wefan ei lansio ar Fai 15

Mae gwefan newyddion Golwg360 yn "embaras i Lywodraeth y Cynulliad a phawb arall sy'n ymwneud â hi," meddai Aelod Cynulliad.

Dywedodd Alun Cairns, aelod Pwyllgor Diwylliant y cynulliad, ei fod yn bwriadu codi'r mater â'r Gweinidog Diwylliant.

Mae Golwg wedi dweud eu bod "wedi sefydlogi'r gwasanaeth" ac wedi ei gwneud yn glir o'r dechrau mai "cyfnod prawf oedd hwn".

Honnodd Mr Cairns, AC Ceidwadol Canol De Cymru, ei fod yn poeni am drafferthion y gwasanaeth newydd gafodd ei lansio ar Fai 15.

Mae'r safle wedi wynebu problemau technegol.

Roedd Llywodraeth y Cynulliad wedi clustnodi £600,000 am fwy na thair blynedd fel bod modd datblygu gwasanaeth newyddion Cymraeg ar y we.

Dywedodd Mr Cairns ei fod yn pryderu o gofio faint o arian cyhoeddus oedd wedi ei wario.

Mae Dylan Iorwerth, Golygydd Gyfarwyddwr Golwg, wedi dweud eu bod wedi cydweithio â chwmnïau eraill i ddatblygu'r safle.

Alun Cairns AC
Dywed Alun Cairns fod y wefan yn "embaras i Lywodraeth y Cynulliad"

Cafodd meddalwedd ar gyfer y wefan ei datblygu gyda chefnogaeth cwmni Tinopolis yn Llanelli.

Dywedodd cwmni Golwg a Tinopolis ar y cyd fod y cyfrifoldeb am "fanyldeb technegol" wedi ei drosglwyddo i gwmni arall.

"Nid cwmni Tinopolis oedd wedi gwneud y gwaith datblygu," meddai'r datganiad.

Gofynnwyd i'r cwmni arall am sylw ond hyd yn hyn dyw'r cwmni ddim wedi ymateb.

Dywedodd datganiad Golwg a Tinopolis "nad oedd cyfarwyddiadau'r dogfennau gwreiddiol wedi eu dilyn ac, ers hynny, mae Tinopolis wedi bod yn gweithio'n uniongyrchol gyda Golwg Newydd i adfer y sefyllfa.

"Does dim o'r arian cyhoeddus wedi mynd i Tinopolis ac mae Golwg Newydd wedi cael y drwydded i ddefnyddio'r feddalwedd yn rhad ac am ddim.

"Bellach mae Tinopolis wedi cymryd cyfrifoldeb uniongyrchol am y feddalwedd ac yn gorffen y gwaith cywiro yn rhad ac am ddim hefyd.


'Dan ni wedi sefydlogi'r gwasanaeth newyddion - sef y peth canolog

Dylan Iorwerth, Golygydd Gyfarwyddwr Golwg

Yn ôl Mr Iorwerth, problemau pythefnos yn ôl oedd y rhain.

"Doedd neb wedi gallu rhagweld yr union broblem gododd gan fod honno wedi mynd yn waeth pan ddechreuodd pobl ddefnyddio'r safle yr un pryd," meddai.

"'Dan ni wedi sefydlogi'r gwasanaeth newyddion - sef y peth canolog."

Y Cyngor Llyfrau sy'n gweinyddu'r grant ar ran Llywodraeth y Cynulliad.

Dywedodd llefarydd eu bod yn gwybod bod hwn yn gyfnod prawf.

"Ond fe amharodd problemau technegol ar y cyfnod hwn.

"Mae'r problemau wedi sefydlogi erbyn hyn ac fe gafwyd ymateb ffafriol i gynnwys y wefan."



HEFYD
Lansio gwefan newydd Golwg360
15 Mai 09 |  Newyddion
Gwefan Golwg gam yn nes
30 Ebr 09 |  Newyddion
Enwi pennaeth gwefan Golwg
05 Medi 08 |  Newyddion
Golwg yn llygadu'r we
04 Rhag 07 |  Newyddion

CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific