Arwyddion: 'Y ffordd ymlaen?'

Yr arwyddion yn 'ddirgelwch'

Am gyfnod roedd arwyddion ffordd ger gwaith atgyweirio yn Sir Gaergrawnt yn Gymraeg a Saesneg.

Cafodd pedwar o arwyddion eu gosod ar y ffordd yn rhybuddio gyrwyr fod angen arafu ar Longthorpe Parkway yn Peterborough.

Mae nifer o yrwyr wedi ffonio'r cyngor lleol a chafodd nifer o luniau eu tynnu.

Dywedodd llefarydd ar ran y cyngor: "Mae'r arwyddion wedi eu rhoi yno ond dydyn ni ddim yn siŵr sut na pham.

"Mae'n dipyn o ddirgelwch."

'Jôc'

Dywedodd mai contractwyr oedd yn gweithio yno a bod y ffordd wedi ei chau dros nos.

"Pan ail-agorodd hi, doedd dim cyfyngiadau cyflymdra mewn grym. Felly, doedd dim angen arwyddion.

"Dydyn ni ddim yn gwybod pam y byddai arwyddion cyfyngiadau cyflymdra'n cael eu gosod yno."

Ychwanegodd y llefarydd y gallai'r cyfan fod wedi bod yn jôc.

Erbyn hyn mae'r arwyddion wedi cael eu tynnu i lawr.