Lansio gwefan newydd Golwg360

Fe fydd Golwg a Golwg Newydd yn cyflogi naw o staff newydd

Gweinidog Treftadaeth Cymru, Alun Ffred Jones, wnaeth lansio gwefan newyddion a materion cyfoes annibynnol newydd yn Llandudno ddydd Gwener.

Fe fydd Golwg360 yn cynnwys gwasanaeth newyddion ar y pryd ac yn rhoi'r cyfle i fusnesau a chyrff cyhoeddus a chymunedol gael eu tudalennau eu hunain ar y safle.

Golwg Newydd fydd yn rhedeg y gwasanaeth, chwaer gwmni i'r cylchgrawn wythnosol Golwg.

Mae Llywodraeth y Cynulliad yn cefnogi'r cynllun drwy roi grant blynyddol o £200,000 i Golwg Newydd.

Cafodd yr arian ei glustnodi er mwyn datblygu'r wasg Gymraeg.

Bydd rhagor o wasanaethau'n cael eu hychwanegu yn dilyn ymgynghoriad â defnyddwyr y gwasanaeth i'r wefan.

Cafodd rhai pobol anhawster technegol wrth geisio defnyddio'r gwasanaeth newydd.

Brynhawn Gwener, roedd neges ar y wefan yn dweud: "Mae'n ddrwg iawn gynnon ni am hynny ac rydym wrthi'n ceisio datrys y broblem.

"Diolch am fod yn amyneddgar. Ryden ni'n gwneud ein gorau!"

'Cryfhau'r wasg Gymraeg'

I gyd-fynd â lansiad y gwasanaeth ar-lein, mae'r cylchgrawn traddodiadol yn ymddangos ar ei newydd-wedd, gyda rhagor o dudalennau a mathau newydd o straeon a cholofnau yn cael eu cyhoeddi.

Mae naw o swyddi newydd wedi cael eu creu, gan gynnwys pedwar newyddiadurwr rhwng Golwg a Golwg Newydd.

Dywedodd Mr Jones ei fod yn falch o gael lansio'r gwasanaeth ac yn dymuno pob llwyddiant i'r fenter wrth i'r gwasanaeth ddatblygu dros y misoedd nesaf.

Fe fydd y cylchgrawn Golwg ar ei newydd-wedd hefyd

"Yn sicr, mae yn ddiwrnod cyffrous iawn ym myd newyddiaduraeth yn yr iaith Gymraeg.

"Mae Llywodraeth y Cynulliad yn gefnogol i gryfhau'r ddarpariaeth o ran newyddiaduraeth trwy'r Gymraeg; mae'r fenter yma yn fuddsoddiad pwysig i'r dyfodol."

Dywedodd Cadeirydd Golwg Newydd, Gwynfryn Evans, bod hwn yn "ddatblygiad pwysig i Golwg".

"Ond hefyd i'r wasg Gymraeg a gobeithio i'r iaith Gymraeg ei hun.

"Ar adeg o gyni, mae'n wych gweld gwasanaeth newydd hanesyddol yn cael ei greu."

'Gwasanaeth i Gymru gyfan'

Ychwanegodd Golygydd Gyfarwyddwr Golwg, Dylan Iorwerth, y bydd y wefan yn cynnwys pob math o newyddion a gwybodaeth.

"Yn y pen draw, mi fydd cyfle i bawb gyfrannu a chyhoeddi eu tudalennau eu hunain."

Mae Golwg360 yn pwysleisio y bydd y gwasanaeth ar gael i bawb yng Nghymru a thu hwnt.

Dywedodd Prif Weithredwr Golwg360, Ioan Wyn Evans, bod hwn yn wasanaeth i Gymru gyfan ac i siaradwyr Cymraeg ar draws y byd.

"Dyna un rheswm dros lansio yn Llandudno yn hytrach nag yn ein swyddfeydd yn Llambed neu Gaernarfon - does dim gwahaniaeth lle'r ydech chi, mae Golwg360 ar gael."

Yn bresennol yn y lansiad roedd disgyblion ysgol sydd wedi cael y cyfle i ddylunio eu tudalennau eu hunain a chwmni Tinopolis sydd wedi cefnogi ochr dechnegol y prosiect.