British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Iau, 7 Mai 2009, 05:54 GMT 06:54 UK
Gwisg newydd i nyrsys Cymru

Y nyrs Fernando Estolas, cynorthwydd iechyd Cheryl Thomas, nyrs arbenigol Sharon Evans a Lynne Greenhill prif nyrs y ward gyda'r myfyriwr Claire Thomas fel claf
Pedwar nyrs yn arddangos y gwisgoedd newydd i glaf

Mae gan nyrsys a bydwragedd yng Nghymru ddillad newydd.

Cafodd manylion y gwisgoedd newydd eu cyhoeddi ddydd Iau.

Fe fydd y dillad yn helpu cleifion i wybod pwy ydy pwy ar y wardiau.

Cymru ydi'r wlad gyntaf yn y Deyrnas Unedig i gyflwyno gwisg safonol ar draws y Gwasanaeth Iechyd.

Mae'r gwisgoedd mewn lliwiau gwahanol yn unol â gwaith y staff ar y wardiau.

Dywedodd Llywodraeth y Cynulliad y byddai'r gwisgoedd newydd yn sicrhau na fydd 'na ddryswch am rôl staff.

Mae'r gwisgoedd gwyn oedd wedi eu startsio wedi diflannu ac mae dynion a merched yn gwisgo trowsus a thop llac.

Lledu heintiau

Fe fydd prif nyrs y ward mewn lliw glas tywyll, nyrsys clinigol arbenigol mewn lliw glas brenhinol a nyrsys yn gwisgo lliw glas golau.

Gwyrdd fydd lliw dillad cynorthwywyr iechyd.

Roedd y penderfyniad i gael gwisg gyffredinol i bawb oherwydd pryder bod staff yn gwisgo dillad y tu allan i'r gwaith a'u bod yn gallu lledu heintiau.

Yr hyn sy'n yumddangos ar y gwisgoedd newydd
Yr hyn sy'n ymddangos ar y gwisgoedd newydd

"Dydi'r gwaith ymchwil ddim yn cadarnhau hyn, dyna'r sylw sy'n cael ei wneud," meddai Rosemary Kennedy, Prif Swyddog Nyrsio Cymru.

"Roedden ni eisiau gwneud yn siwr bod y wisg yn hawdd ei hadnabod ..."

Dywedodd eu bod yn trafod gwisg gweithwyr ysbyty eraill, gan gynnwys meddygon a staff o gefndir ethnig.

"Mae gennym ni feddygon sy'n cerdded o gwmpas gyda'u cotiau gwyn yn agored," meddai.

Fe fydd 33,000 o nyrsys Cymru yn dechrau derbyn eu gwisg newydd - un set am bob shifft yn yr wythnos - o fis Hydref ymlaen.

Dymuniad Llywodraeth y Cynulliad ydi cael golchdy mewn ysbytai ar gyfer y gwisgoedd yn lle eu bod yn cael eu golchi adref.

'Unffurf'

"Fe fydd y wisg newydd yn helpu magu hyder ychwanegol ... ac yn sicrhau bod ymwelwyr yn gwybod yn syth pwy yw'r nyrs a phwy yw'r brif nyrs," meddai'r Gweinidog Iechyd, Edwina Hart.

"Dwi'n falch iawn bod y proffesiwn wedi bod yn rhan o hyn.

"Mae angen newid y wisg yn aml ac mae cynllun unffurf yn fwy effeithiol o ran costau."

Fe fydd Coleg Brenhinol y Nyrsys yn trafod eu bwriad i gyflwyno gwisg debyg yn Lloegr yr wythnos nesaf.

"Gall gwisg olygu ymdeimlad o falchder ...," meddai Cyfarwyddwr Cymru, Tina Donnelly.

"Bydd y lliwiau gwahanol yn helpu cleifion a'u teuluoedd i wybod pwy ydi pwy.

"Bydd gwasanaeth golchi ac ystafell newid yn golygu llai o glefydau mewn ysbytai."



Chwiliwch yn Gymraeg


HEFYD
Ysbytai: Dathlu ymgyrch
08 Ebr 09 |  Newyddion
Ysbytai: Nyrsys i sicrhau glendid
26 Meh 08 |  Newyddion
Nyrsys i gael gwisgoedd newydd
23 Meh 08 |  Newyddion

CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific