Arweinydd yn ymddiswyddo

Fis Mawrth dechreuodd staff Archwilydd Cyffredinol Cymru eu hymchwiliad i Gyngor Sir Ynys Môn

Mae Arweinydd Cyngor Sir Ynys Môn, y Cynghorydd Phil Fowlie, wedi cyhoeddi y bydd yn ymddiswyddo.

Mae'r Cynghorydd Phil Fowlie wedi ymddiswyddo fel Arweinydd y Cyngor ac Arweinydd y Grŵp Annibynnol Gwreiddiol oherwydd rhesymau iechyd.

Bydd yn parhau i gynrychioli ward Rhosneigr ar y Cyngor.

Mae'r Cyngor wedi enwebu y Cynghorydd Clive McGregor fel arweinydd newydd ac fe fydd pleidlais yn cael ei chynnal ddydd Mawrth.

'Cyngor meddygol'

Dywedodd y Cynghorydd Fowlie, "Yn anffodus, yn dilyn cyngor meddygol, rwyf wedi cadarnhau fy mod yn ymddiswyddo fel Arweinydd y Cyngor.

"Mae hi wedi bod yn fraint cynrychioli'r Awdurdod a phobl Môn fel Arweinydd y Cyngor ers Mai 2008. Mae gan yr Awdurdod sawl her ac rwy'n dymuno'n dda i fy olynydd."

Bydd grŵp mwyaf y Cyngor, y grŵp Annibynnol Gwreiddiol, nawr yn enwebu Arweinydd newydd.

Bydd Cyfarfod Cyffredinol Blynyddol y Cyngor Sir ar Fai 5 yn ethol Arweinydd newydd.

Rheolwr-gyfarwyddwr

Yn gynharach y mis hwn, cadarnhaodd Cyngor Ynys Môn y bydd y rheolwr-gyfarwyddwr, Derrick Jones, yn gadael ei swydd.

Mae'r awdurdod a Mr Jones wedi penderfynu ar y cyd y bydd yn gadael cyn i'w gytundeb ddod i ben.

Fis Mawrth dechreuodd staff Archwilydd Cyffredinol Cymru eu hymchwiliad i Gyngor Sir Ynys Môn.

Yn ôl yr archwilydd, Jeremy Colman, fe ddylai'r modd y mae'r cyngor yn cael ei reoli fod yn destun pryder i bawb.

Ers blynyddoedd, mae ffraeo mewnol wedi bod yn nodwedd amlwg o Gyngor Sir Ynys Môn.