Rali GB Cymru dan fygythiad

Mae'r mudiad yn bwriadu mynd i'r llys oherwydd torgytundeb honedig

Mae 'na bryder na fydd Rali GB Cymru yn cael ei chynnal ar ôl i Lywodraeth y Cynulliad dynnu £2 filiwn o gyllid yn ôl.

Er bod 'na cytundeb rhwng Hydref 22 hyd at rali 2011, dywedodd trefnwyr eu bod "wedi cael sioc ac yn siomedig".

Yn ôl International Motor Sports Limited (IMS), does ganddyn nhw ddim dewis ond mynd i'r llys oherwydd torgytundeb honedig.

Dywedodd Llywodraeth y Cynulliad nad oedd yn addas ymateb ar hyn o bryd.

Mewn datganiad fe ddywedodd yr IMS bod rali 2009 "o dan fygythiad".

Fe ddywedodd y Dirprwy Brif Weinidog, Ieuan Wyn Jones, ba mor bwysig oedd y rali nôl yn 2007 Andrew Coe, prif weithredwr IMS

"Doedd 'na ddim ymgynghoriad na rhybudd ... cyn iddyn nhw benderfynu torri cyllid Rali GB Cymru.

"Fe ddywedodd y Dirprwy Brif Weinidog, Ieuan Wyn Jones, ba mor bwysig oedd y digwyddiad nôl yn 2007, gan fynnu bod y rali yn codi proffil Cymru ac yn rhoi hwb i'r sector moduro".

'Torri cytundeb'

Mae Prif Weithredwr IMS Andrew Coe wedi honni bod y cytundeb gafodd ei arwyddo gan Lywodraeth y Cynulliad ar Fawrth 30, 2006 hyd at ddiwedd rali 2011 wedi cael ei dorri.

Mae torri'r cyllid yn tanseilio'r ymdrechion i gynnal digwyddiadau ar lefel Brydeinig yng Nghymru Alun Cairns o'r Blaid Geidwadol

Ychwanegodd: "Mae'r paratoadau ar gyfer Rali GB Cymru ym mis Hydref yn mynd yn dda ac mae disgwyl y bydd y digwyddiad yn cael ei lansio ddiwedd y mis.

Fe ddywedodd AC y Ceidwadwyr Alun Cairns: "Os yw Cymru eisiau cynnal digwyddiadau a gemau chwaraeon ar lefel Brydeinig mae angen cael cefnogaeth oddi wrth y llywodraeth.

"Mae'r adroddiadau hyn bod y gweinidogion eisiau torri'r cyllid ar gyfer Rali GB Cymru ar fyr rybudd yn tanseilio'r ymdrechion hyn.

"Ac maen nhw'n tanseilio ymrwymiad Llywodraeth y Cynulliad i ddenu digwyddiadau mawr fel Cyfres y Lludw a Chwpan Ryder i Gymru."