British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Sadwrn, 14 Mawrth 2009, 12:28 GMT
Rhodd o £60,000 i ofal canser

Claf Joyce Boyle a'i therapydd Ruth Best
Mae'r peiriant yn dangos lluniau clir i'r claf a'r meddygon

Fe fydd cyfarpar electronig newydd sy'n gallu tynnu lluniau fideo'n ddwfn tu mewn i yddfau fod o gymorth i gleifion canser mewn ysbyty yn Abertawe.

Mae'r cyfarpar yn gallu helpu cleifion canser y gwddw a'r pen ar draws de Cymru.

Mae'r uned yn Ysbyty Singleton.

Mae tua 150 o achosion o'r math yma o ganser yn ne Cymru bob blwyddyn, tair gwaith yn fwy na'r cyfartaledd ar draws y DU.

Her Canser Castell-nedd Port Talbot wnaeth dalu am y cyfarpar £60,000.

Dywedodd yr arbenigwr Martin Rolles o'r ysbyty bod y cyfarpar yn gwneud gwahaniaeth eisoes i gleifion.

Roedd yn ddiolchgar iawn i'r elusen am eu rhodd.

Gall y clefyd effeithio ar unrhyw ran o'r wyneb, y geg, sinws a'r llwnc.

Mae'n gallu cael effaith ar leferydd a llyncu.

'Anawsterau'

"Dyma rodd hael iawn ac fe fydd yn caniatáu meddygon a therapyddion llefaredd fonitro'r cleifion yn well a'u cynorthwyo i wella," meddai Mr Rolles.

"Mae'n hanfodol i ganfod unrhyw arwydd o ganser yn dychwelyd ac i adnabod y driniaeth gywir."

Dywedodd Ruth Best, therapydd iaith a llefarydd Macmillan, bod nifer o gleifion yn wynebu anawsterau i lyncu ac i siarad ar ôl cael triniaeth.

"Mae'r cyfarpar yn helpu ni i asesu'r claf ac yn dangos y cynnydd mae'r claf yn ei wneud.

"Mae cael lluniau fideo mor glir yn helpu'r claf i weld yr hyn sy'n digwydd tu mewn."

Dywedodd Ms Best bod cleifion yn cael anogaeth o'r cyfarpar.

Un sy'n defnyddio'r cyfarpar i ailddysgu llyncu ar ôl cael triniaeth ydi Joyce Boyle o Faglan.

"Mae'r cyfarpar yn wych," meddai

"Dwi'n benderfynol o ddysgu llyncu er mwyn cael paned o de," ychwanegodd Ms Boyle sy'n derbyn ei maeth o diwb ar hyn o bryd.



Chwiliwch yn Gymraeg


CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific