Dubai yn denu'r doctor

David Tennant yw'r Doctor yn y gyfres newydd

Mae tîm cynhyrchu ac actorion y gyfres Doctor Who wedi teithio i'r Gwlff Arabaidd i ffilmio ar gyfer sioe arbennig y Pasg.

Fe ddechreuwyd ffilmio Planet Of The Dead sy'n cynnwys David Tennant fel y Doctor fis diwethaf.

Mae Michele Ryan, seren Bionic Woman a Merlin yn chwarae rhan cymeriad rhyfeddol y Foneddiges Christina de Souza, ac yn ymuno gyda David Tennant ar drip bws peryglus.

Mae'r comediwr Lee Evans hefyd â rhan yn y sioe.

Yn ôl y cyfarwyddwr, Tracie Simpson: " Ry' ni bron byth yn mynd â'r Doctor dramor, er i ni fod yn Rhufain yn ffilmio "The Fires of Pompeii" ar gyfer y bedwaredd gyfres.

"Mae'r lleoliadau yn Dubai yn cydweddu'n dda gyda gweledigaeth yr awdur Russell T Davies o'r bennod, ac ry ni'n disgwyl ffilmio golygfeydd anghredadwy tra ein bod ni yma."

Planet Of The Dead, fydd y gyntaf mewn cyfres o bedair rhaglen arbennig fydd yn cael eu darlledu eleni.

Bydd y bennod yn cael ei darlledu ar BBC1 yn y gwanwyn.