Prif weithredwr cyngor yn gadael

Dywedodd Mr Miller ei fod bellach wedi cyflawni ei brif amcanion

Fe fydd prif weithredwr cyngor sir Ddinbych, Ian Miller, yn gadael ei swydd ddiwedd yr wythnos.

Ar ôl bod wrth y llyw ers 2002 dywedodd Mr Miller ei fod bellach wedi cyflawni ei brif amcanion, a bod gwelliannau mawr wedi eu cyflwyno yn ystod y cyfnod hwnnw.

Roedd dau adroddiad beirniadol ym Medi'r llynedd am ddyfodol addysg yn Sir Ddinbych a chafodd y cyngor ei feirniadu yn ddiweddar oherwydd y modd yr agorodd a chau cartre' preswyl i blant awtistig.

Yn ôl yr aelod seneddol lleol Ann Jones, mae ei ymadawiad yn "anffodus ond angenrheidiol".

Dywedodd Ms Jones bod gan y sir "ddelwedd o gael ei lywodraethu'n wael".

'Cyflawni'r prif amcanion'

Yn ôl Mr Miller: "Wedi bron i saith mlynedd gyda'r Cyngor, rwy'n teimlo fy mod wedi cyflawni'r prif amcanion yr oeddwn wedi eu gosod i mi fy hun pan ymunais i. Wedi cryn werthuso fy mlaenoriaethau a thrafodaethau positif, manwl gyda chydweithwyr, rwyf wedi penderfynu mai dyma'r amser addas i ddilyn sialensiau newydd.

"O ganlyniad i'r gwaith yr wyf wedi ei arwain yn y blynyddoedd diweddar, yn cynnwys yr ymrwymiad cryf i gyd-weithio, mae'r Cyngor yn awr mewn safle i daclo sialensiau'r cyfnod sydd i ddod a pharhau ar ei siwrne o welliannau dan arweinyddiaeth newydd.

"Mae cyllidebau'r Cyngor wedi eu sefydlogi, fe sicrhawyd cronfeydd sylweddol wrth gefn ac mae blaenoriaethau strategol clir yn eu lle ar gyfer y cyfnod hyd at yr etholiadau nesaf yn 2012.

"Rwy'n credu'n bendant fod y sylfeini yn eu lle i'r Cyngor fynd o nerth i nerth."

'Gwas ardderchog'

Dywedodd arweinydd y cyngor, Hugh Evans, "Mae Ian wedi bod yn was ardderchog i Gyngor Sir Ddinbych a theulu ehangach llywodraeth leol. Mae wedi dangos ymrwymiad eithaf, ymroddiad a gonestrwydd yn ystod ei gyfnod gyda Sir Ddinbych."

Roedd adroddiad Arolygiaeth Gofal a Gwasanaethau Cymdeithasol Cymru ac arolygwyr Estyn wedi dweud bod y cynllun i sefydlu cartre' Hyfrydle wedi'i reoli'n wael, bod 'na ddiffyg cyfathrebu a diffyg cydweithio o fewn yr awdurdod lleol.

Roedd dau adroddiad beirniadol ym Medi'r llynedd am ddyfodol addysg yn Sir Ddinbych , un gan gwmni Cambridge Education a'r llall gan y corff arolygu addysg Estyn.

Dywedodd adroddiad Cambridge Education nad yw plant na phobl ifanc yn cael y sgiliau angenrheidiol.

Nododd Estyn fod 'na dangyrhaeddiad ymhlith plant 7, 11 ac 16 oed.

Ariannu addysg uwchradd yn y sir, meddai Estyn, oedd yr ail isaf yng Nghymru ac roedd perfformiad addysg uwchradd yn y sir yn is na'r hyn oedd yn dderbyniol drwy Gymru.

Mae'r cyngor wedi dweud eu bod nhw wedi buddsoddi arian er mwyn ceisio gwella'r sefyllfa.