Ceiso datgelu cyfrinachau'r byd

Dr Lyn Evans sy'n arwain y tim o wyddonwyr yn Genefa

Mae Cymro yn arwain tîm o wyddonwyr yn y Swistir sy'n cynnal arbrawf sy'n cael ei ddisgrifio fel yr arbrawf mwyaf yn y byd.

Nod yr arbrawf yng nghanolfan ymchwil CERN ger Genefa yw ceisio datgelu cyfrinachau sut y cafodd y bydysawd ei greu biliynau o flynyddau yn ol.

Mae'r prosiect dan arweiniad y Dr Lyn Evans, sy'n wreiddiol o Aberdâr.

Bydd peiriant sydd wedi costio £5 biliwn yn hyrddio atomau at ei gilydd ar gyflymder anhygoel gyda'r nod o geisio ail-greu'r cyfnod wedi'r hyn ddigwyddodd pan ehangodd y bydysawd.

Mae 4,600 o staff yn gweithio ar y prosiect sy'n fenter ar y cyd rhwng 20 o wledydd Ewrop.

Mae'r gwaith adeiladu wedi cymryd 14 o flynyddoedd.

Dywedodd Dr Lyn Evans, 63, mai'r gobaith yw darganfod mwy am sut y cafodd y bydysawd ei greu.

"Ry'n ni'n chwilio am yr atebion i gwestiynau elfennol y byd ac, yn aml iawn, i gael yr atebion am y petha lleiaf rhaid cael y peiriannau mwya."

Mae o wedi wfftio honiadau gan rai y gallai'r arbrawf arwain at drychineb a hyd yn oed ddiwedd y byd.

"Peidiwch â phoeni - bydd yna ddim tsunami ym Mae Caerdydd.

"Mae'r honiadau yn nonsens pur."