Gwobr fawr i wyl fach

Mae'r ŵyl wedi ei chynnal yn flynyddol ers 2004

Mae gŵyl gerddorol fach wedi ennill gwbor am fod yn ecogyfeillgar yr un pryd â gwyliau mwy fel Ynys Wydrin.

Bob mis Gorffennaf mae Gŵyl y Tloty yn Llanfyllin, Powys, yn denu 5,000 o bobl.

Hwn yw'r unig ddigwyddiad o'i fath yng Nghymru i gael Gwobr Gŵyl Werdd 2008, un o 19 drwy'r byd.

Cafodd yr ŵyl ei chanmol am ddefnyddio cyflenwyr lleol a thrydan o gyflenwad adnewyddol.

Yng ngwledydd Prydain cafodd 15 o wyliau wobr, tair yn Awstralia ac un yn America.

Dechreuodd Gŵyl y Tloty yn 2004 i gefnogi cynllun tymor hir i adnewyddu hen dloty o oes Fictorian yn Llanfyllin.

Eco-gyfeillgar

"Mae'r ŵyl yn rhoi blaenoriaeth i fasnachwyr lleol," meddai'r beirniaid.

"Does dim rhaid i gynnyrch deithio'n bell ac mae'n gwneud pob ymdrech i ailgylchu defnyddiau."

Roedd holiadur yn cyfeirio at reolaeth, trafnidiaeth, allyriadau carbon deuocsid, masnach deg, rheoli gwastraff ac ailgylchu, rheoli dŵr a llygredd sŵn.

Ymhlith yr enillwyr mae Ynys Wydrin, Gŵyl Werin Caergaint a Hard Rock Calling.

Roedd mwy na 177,000 yn Ynys Wydrin eleni.