Gogledd: Prawf yn 'fwy anodd'

Mae'r gyfradd llwyddo yng Nghymru yn 49% - 5% yn uwch nag yn Lloegr

Mae Aelod cynulliad wedi gofyn i'r Asiantaeth Safonau Gyrru pam ei bod "yn fwy anodd" i basio profion gyrru yn y gogledd.

Dywedodd Chris Franks, aelod Plaid Cymru yng Nghanol De Cymru, fod ystadegau'r asiantaeth yn awgrymu bod y canlyniadau'n amrywio'n "fawr" o aradal i ardal.

Tra bod 35% yn llwyddo yn y Rhyl, Sir Ddinbych, mae 63% yn llwyddo yn Llanbedr Pont Steffan, Ceredigion.

Yn ôl yr asiantaeth, mae ffactorau cymdeithasol ac economaidd yn effeithio ar y canlyniadau.

Mae'r gyfradd llwyddo yng Nghymru yn 49%, 5% yn uwch nag yn Lloegr.

Dyma'r cyfraddau llwyddo yng Nghymru yn 2007-8:

Aberystwyth 50%

Y Bala 37.9%

Bangor 45.8%

Y Barri 46.6%

Caerdydd 53%

Aberteifi 58%

Bae Colwyn 39%

Caergybi 50.8%

Llandrindod 68.8%

Merthyr 53%

Yr Wyddgrug 38.64%

Pontypridd 50.85%

Pwllheli 54.28%

Rhyl 35%

Dywedodd Mr Franks: "Mae'n ymddangos yn fwy anodd i basio prawf gyrru yn y gogledd ... nag mewn rhannau o orllewin Cymru.

"Dwi'n siwr bod dysgwyr yn disgwyl cael eu trin yn gyfartal pa le bynnag y maen nhw'n cymryd eu prawf."

Dywedodd llefarydd ar ran yr asiantaeth: "Y mwya cyfoethog y mae ardal, y mwyaf y mae pobl yn debygol o fuddsoddi mewn gwersi ac mae mwy o gyfleoedd i ymarfer mewn ceir teuluol ac ati.

"Byddai'n annhebygol pe bai pob canolfan prawf yn cael yr un gyfradd llwyddo."