Antigua: Rhyddhau pump o'r wyth

Priododd Ben a Catherine ar Orffennaf 12

Mae pump o'r wyth o bobl gafodd eu harestio mewn cysylltiad â marwolaeth cwpl oedd ar eu mis mêl ar Ynys Antigua wedi cael eu rhyddhau.

Mae'r tri arall yn dal i gael eu cadw yn y ddalfa ac yn cael eu holi gan swyddogion, meddai heddlu Antigua.

Cafodd yr wyth dyn, sydd yn eu 20au, eu harestio ar ôl cyfres o gyrchoedd ar yr ynys.

Daw hyn ar ôl i ddwy ddynes, 32 oed a 22 oed, ymddangos o flaen ynadon ar yr ynys ddydd Iau.

Cafodd y ddwy eu cyhuddo a'u cadw yn y ddalfa. Credir eu bod wedi eu harestio mewn cysylltiad ag eiddo gafodd ei ddwyn o fwthyn gwyliau'r cwpl.

Bu farw Catherine Mullany o Bontardawe yn syth ar ôl cael ei saethu a bu farw Ben wythnos yn ddiweddarach yn yr ysbyty ar ôl iddo ddychwelyd i Gymru.

Cafodd y cwpl, oedd yn 31 oed, eu saethu yn eu bwthyn gwyliau ar Orffennaf 27, pymtheg niwrnod ar ôl iddyn nhw briodi.

Dydd Mercher cafodd Mr a Mrs Mullany eu claddu mewn gwasanaeth preifat yn yr eglwys lle oedd y ddau wedi priodi.

Cafodd y ddau eu saethu yn eu hystafell wely yng ngwesty Cocos yn ne orllewin Antigua.