Saethu ar fis mêl: Ben wedi marw

Priododd Ben a Catherine ar Orffennaf 12

Mae dyn 31 oed o ardal Abertawe gafodd ei saethu tra ar ei fis mêl ar Ynys Antigua wedi marw.

Bu farw Benjamin Mullany ar ôl profion ar ei ymennydd yn ysbyty Treforys Abertawe.

Cafodd gwraig Benjamin, Catherine oedd hefyd yn 31 oed, ei lladd yn y digwyddiad wythnos yn ôl.

Roedd Mr Mullany yn fyfyriwr ffisiotherapi trydedd flwyddyn ym Mhrifysgol Gorllewin Lloegr ym Mryste.

Priododd y ddau ar Orffennaf 12 ym Mhontardawe.

Cafodd gwasanaethau arbennig eu cynnal yng nghapeli ac eglwysi ardal Pontardawe ddydd Sul.

Mae llyfr cydymdeimlad wedi ei agor yng nghapel ysbytai Treforys a Singleton yn Abertawe.

Yn y cyfamser, mae pump o swyddogion yr heddlu o Brydain wedi ymweld â safle'r saethu yn y Caribî er mwyn helpu'r heddlu lleol.

Cafodd gwasanaeth arbennig ei gynnal ym Mhontardawe ddydd Sul

Maen nhw wedi mynd yno, wedi eu harwain gan yr uwch arolygydd Keith Niven, ar gais yr heddlu lleol sydd wedi cyfaddef bod yr ymchwiliad wedi eu hymestyn i'r eithaf.

Mae gwobr ariannol o tua £67,000 eisoes wedi'i gynnig er mwyn ceisio dal y llofrudd.

Mae'r heddlu yn holi dyn lleol mewn cysylltiad â'r ymosodiad.