Saethu ar fis mêl: Ben nôl adref

Ambiwlans yn cludo Ben Mullaney ym Maes Awyr Rhyngwladol Caerdydd

Mae dyn 31 oed sydd mewn cyflwr difrifol ar ôl cael ei saethu tra ar ei fis mêl ar Ynys Antigua wedi cyrraedd yn ôl i Gymru.

Glaniodd yr awyren ambiwlans oedd yn cludo Benjamin Mullaney , 31 oed, ym Maes Awyr Rhyngwladol Caerdydd yn gynnar ddydd Sadwrn, a chafodd Ben ei gludo i Ysbyty Treforys Abertawe lle mae meddygon yn asesu ei gyflwr.

Cafodd gwraig Ben, Catherine, oedd yn 31 oed, ei lladd ddydd Sul.

Fe wnaeth ei rhieni hi, David a Rachel Bowen, hebrwng ei chorff yn ôl ar awyren a laniodd ym maes awyr Gatwick am 5.10am ddydd Sadwrn.

Yn y cyfamser, dywedodd pennaeth Heddlu Antigua, Gary Nelson, bod un person yn y ddalfa yn cael ei holi mewn cysylltiad â'r saethu.

Ychwanegodd Mr Nelson fod achos Catherine a Benjamin Mullaney yn debyg i achos blaenorol pan gafodd dyn ei saethu ar yr ynys lai na deufis yn ôl.

'Cysylltiad'

Roedd yr achos hwnnw hefyd yn ymddangos fel lladrad, a chafodd dyn ifanc ei saethu yng nghefn ei ben.

"Rwy'n credu nad dyma'r tro cyntaf i'r llofruddwyr daro a dwi'n credu bod yna gysylltiad gydag achosion eraill," meddai Mr Nelson.

Mae gwobr ariannol o £67,000 wedi cael ei gynnig am wybodaeth fydd yn arwain at ddedfrydu'r llofrudd.

Cafodd Mr Mullany ei saethu yng nghefn ei ben.

Priododd Ben a Catherine ar Orffennaf 12

Fe adawodd Ysbyty Holberton yn y brifddinas, St John's, ddydd Gwener.

Mae wedi bod ar beiriant cynnal bywyd.

Fe wnaeth meddygon gludo Mr Mullaney o'r ysbyty ar y daith 10 munud i'r maes awyr.

Cyfle i wella

Yn ôl adroddiadau o'r ysbyty ychydig iawn o siawns oedd gan Mr Mullaney i wella ond roedd ei rieni, Marilyn a Cynlais, yn credu bod ganddo fwy o gyfle i wella yn ôl ym Mhrydain.

Doedden nhw ddim yn yr ysbyty pan wnaeth eu mab adael ond roedden nhw wedi treulio 45 munud wrth ei wely.