Tân mewn capel: Cyhuddo dyn

Cafodd y capel ei ddifrodi'n sylweddol gan y tân

Mae Heddlu Dyfed Powys wedi cyhuddo dyn 20 oed mewn cysylltiad â'r tân wnaeth ddifrodi Capel y Tabernacl yn Aberystwyth fis Gorffennaf y llynedd.

Fe fydd y dyn, sy'n dod o'r dref, yn ymddangos o flaen Llys Ynadon Aberystwyth ar Ionawr 28.

Dywedodd llefarydd: "Mae dyn 20 oed o Aberystwyth wedi cael ei gyhuddo o losgi bwriadol."

Bu'n rhaid i 12 o bobl adael eu cartrefi ar ôl y tân yn yr adeilad pedwar llawr.

O ganlyniad, fe adawodd y 12 eu tai yn Stryd Powell y tu ôl i'r capel.

Cafodd yr adeilad ei dymchwel yn ddiweddarach gan ei bod hi'n anniogel.

Roedd yr adeilad o oes Fictoria wedi bod yn wag am fwy na phum mlynedd.

Fe gaeodd yr adeilad, sy'n dyddio'n ôl i 1880, ym mis Tachwedd 2002 oherwydd costau cynnal a chadw.