Trefnydd ddim ar ran ola'r daith

Chwedloniaeth: 20,000 o seintiau wedi eu claddu ar yr ynys

Nid oedd y dyn oedd yn trefnu'r bererindod gyntaf mewn 20 mlynedd i Ynys Enlli mewn gwasanaeth arbennig ar yr ynys oherwydd salwch.

Roedd cannoedd yn ymgynnull ar draeth Aberdaron i wylio cwch yn cynnwys 30 o bererinion yn hwylio i'r ynys ddydd Sadwrn.

Ymhlith y rhai oedd yn gwylio o'r lan yr oedd Esgob Bangor, Anthony Crockett, drefnodd y drydedd bererindod swyddogol i'r ynys.

Roedd un yn 1950 ac un arall yn 1992.

Mae'r esgob yn diodde o ganser ac nid oedd ar y cwch aeth i'r ynys.

Am 10,30am y dechreuodd y bererindod, taith gerdded o Roshirwaun i Aberdaron.

18 mis

Ers 18 mis yr oedd y bererindod wedi cael ei threfnu.

"Mae'r trefniadau ar gyfer y diwrnod yn cynnwys pob math o weithgaredd," meddai cadeirydd pwyllgor y pererindod, y Parchedig Ganon Idris Thomas, ddydd Sadwrn.

Roedd cinio ar draeth Aberdaron, meddai, ac adloniant gan Brigyn, Meinir Gwilym a Lleuwen Steffan.

"Mae gobaith y bydd nifer dda o eglwysi'r esgobaeth, sy'n ymestyn o Gaergybi i Lanidloes ac o Enlli i Landudno, yn cymryd rhan.

"Ond mae croeso i unrhyw un fynd ar y daith."

Yn ôl chwedloniaeth, mae 20,000 o seintiau wedi eu claddu ar yr ynys.

Ac yn ôl traddodiad, roedd tair taith i'r ynys yn cyfateb i un bererindod i Rufain.

Dydd Sadwrn cyhoeddodd Gwasg y Lolfa gyfrol newydd Enid Roberts.

Mae'r gyfrol Bardsey Bound yn cyfeirio at hanes yr ynys, y llwybrau iddi ac yn ceisio esbonio pam yr oedd pererinion yn gadael eu teuluoedd a'u cymunedau i fynd ar daith beryglus i'r ynys.