Urdd am drafod gyda'r cynghorau

Aeth Eisteddfod yr Urdd i Fae Caerdydd ddiwethaf yn 2005

Mae cyfarwyddwr Eisteddfod yr Urdd Aled Sion wedi galw am i gynghorau Cymru ystyried dull newydd o roi arian i'r mudiad.

Ar hyn o bryd mae'r Urdd yn dibynnu ar grantiau oddi wrth y cyngor sir sy'n cynnal yr Eisteddfod .

Daw sylwadau Mr Sion ar ôl i gyngor Caerdydd ddweud na fydda nhw'n rhoi grant pan fydd yr wyl yn ymweld â'r brifddinas yn 2009.

Eleni bydd yr Urdd yn derbyn £300,000 gan gyngor Conwy wrth i'r Eisteddfod gael ei chynnal ar gyrion Llandudno.

Dywed Mr Sion fod angen dull newydd o ariannu oherwydd y pwysau sy'n wynebu awdurdodau lleol yng Nghymru.

Mae o wedi gofyn am gael cyfarfod gyda Cymdeithas Llywodraeth Leol Cymru a Llywodraeth y Cynulliad er mwyn trafod y sefyllfa.

Mae'r Gymdeithas eisoes wedi sefydlu trefn newydd o ariannu'r Eisteddfod Genedlaethol.

Dywedodd Chris Llewelyn o'r Gymdeithas y byddan nhw'n trafod y mater.

Yn ôl llefarydd ar ran Cyngor Caerdydd mae'r cyngor wedi rhoi cefnogaeth ariannol i'r Urdd dwywaith o fewn y pum mlynedd diwethaf.

"Eleni mae'r Cyngor yn cefnogi'r Eisteddfod Genedlaethol ac er y byddwn yn dymuno cefnogir' Urdd y flwyddyn nesa dyw'r gyllideb ddim yn ddiderfyn, " meddai llefarydd.