Addysg gynradd: Newid pwyslais?

Dysgu drwy chwarae fydd y plant o dan y cynllun newydd

Mae'n bosib y bydd cynllun addysg arloesol, sy'n golygu dysgu drwy chwarae, dargedu plant ifanc iawn.

Yn y Senedd ddydd Iau awgrymodd Jane Hutt, y Gweinidog Addysg, y gallai'r cynllun Cyfnod Sylfaen gael ei anelu at blant iau yn gyntaf.

Ond dywedodd llefarydd ar ran Llywodraeth y Cynulliad na fyddai "unrhyw newid i sut y byddai'r Cyfnod Sylfaen yn cael ei gyflwyno.

"Rydyn ni wedi gofyn am wybodaeth ychwanegol oddi wrth awdurdodau lleol erbyn diwedd mis Mai."

Dywedodd y byddai pwyllgor llywio ym mis Mehefin yn ystyried sut y byddai'r cynllun yn cael ei gyflwyno.

Mae llawer o brifathrawon wedi honni nad oes digon o arian ar gyfer y prosiect.

Chwarae

Nod Cyfnod Sylfaen, fyddai'n golygu mwy o athrawon, yw dysgu plant rhwng tair a saith oed wrth chwarae.

Yn y cyfamser, mae Pwyllgor Cyllid y cynulliad yn ymchwilio i'r arian sydd wedi ei neilltuo i'r cynllun.

Fe fydd tystiolaeth oddi wrth Gymdeithas Llywodraeth Leol Cymru, Cymdeithas Cyfarwyddwyr Addysg Cymru, Cymdeithas Brydeinig y Prifathrawon ac undeb athrawon yr NUT.

Mae prifathrawon wedi dadlau fod angen i Lywodraeth y Cynulliad roi mwy o arian.

£5m

Yn ddiweddar, cyhoeddodd Ms Hutt y byddai'r cynllun yn derbyn £5 miliwn yn ychwanegol. Yn wreiddiol, cafodd £107 miliwn ei neilltuo

Mae cynlluniau peilot wedi bod mewn rhai ysgolion ond fe fydd cynllun cenedlaethol yn cael ei gyflwyno ddechrau mis Medi.