Cyn-blismon i sefyll ei brawf

Honnwyd bod y dyn 49 oed wedi creu a meddu ar ddelweddau anweddus

Mae cyn-heddwas wedi bod gerbron Ynadon Caerdydd ar gyhuddiadau'n ymwneud â 2,092 o ddelweddau anweddus o blant.

Ymddiswyddodd Geoffrey Harries, cyn-gwnstabl yn Heddlu Dyfed-Powys, ar Fawrth 26, 2008.

Honnwyd bod y dyn 49 oed o Ben-bre ger Llanelli wedi creu a meddu ar ddelweddau anweddus pan oedd yn blismon.

Mae'n wynebu 15 cyhuddiad o greu delweddau anweddus rhwng Mai 2005 a Rhagfyr 2007 ac un cyhuddiad o feddu ar ddelwedd anweddus ar dachwedd 26 y llynedd.

Dywedodd y Barnwr John Charles fod yr achos yn anaddas ar gyfer Llys Ynadon.

Fe gafodd Mr Harries fechnïaeth ac fe fydd yn ymddangos gerbron Llys y Goron Caerdydd ar Fehefin 16.