Fali-Caerdydd: Teithwyr yn dyblu

Mae mwy na'r disgwyl yn defnyddio'r gwasanaeth

Flwyddyn ers i'r gwasanaeth awyr rhwng Caerdydd ac Ynys Môn ddechrau mae'r cwmni yn falch o'r llwyddiant.

Bu nifer y teithwyr yn llawer uwch na'r hyn gafodd ei ragweld yn wreiddiol.

Roedd Cwmni Highland Airways wedi gobeithio denu 7,500 o deithwyr yn y flwyddyn gynta ond mae'r cyfanswm yn ddwbl hynny.

Mae'r daith o Faes Awyr Y Fali ar Ynys Môn i Faes Awyr Caerdydd yn cymryd tua awr.

Ers dechrau'r gwasanaeth mae bron 15,000 wedi defnyddio'r gwasanaeth.

Mae Llywodraeth Cymru wedi cyfrannu bron £2.5 miliwn am gyfnod o dair blynedd er mwyn cadw prisiau tocynnau yn isel.

Bendithion

Mae tocyn un ffordd yn llai na £50 a gall fod yn llawer is os yw teithiwr yn prynu ymlaen llaw.

Tua awr mae'r daith o'r gogledd i'r de

Dywedodd pennaeth datblygu economaidd Cyngor Ynys Môn, Sasha Wyn Davies, fod y gwasanaeth yn golygu bendithion i'r ynys.

"Mae'r gwasanaeth wedi bod yn llwyddiannus ... wedi helpu busnesau yn y gogledd i gyrraedd y de a chryfhau'r cysylltiadau busnes.

"Ac mae'n denu mwy o bobl o Gaerdydd i aros a dod i fyny i Sir Fôn a gogledd-orllewin Cymru."

Ychwanegodd ei bod yn gobeithio y byddai mwy o awyrennnau ar gael yn y dyfodol.

Agosáu

"Mae'n uno Cymru ac yn gwneud Maes Awyr Rhyngwladol Cymru o fewn cyrraedd pawb," meddai Catrin Ellis, llefarydd ar ran y maes awyr.

"Ac mae'n dod â'r de a'r gogledd yn nes at ei gilydd.

"Mae nifer y bobl sy'n mynd drwy'r maes awyr yn uwch - 2.1 miliwn yn defnyddio'r maes awyr am y tro cyntaf.

"Dyma siwrne drawiadol ac mae 'na bob math o bobl yn ei ddefnyddio, pobl fusnes a rhai sy'n hamddena."

Dywedodd Llywodraeth Cymru fod yr arain buddsoddi'n werth ei wario.

Roedd yn rhy fuan dweud, meddai, a fyddai mwy o gymhorthdal ar gael ymhen dwy flynedd neu a fyddai teithwyr yn gorfod talu'r gwir bris.