Dem Rhydd: Cadw eu dinasoedd?

Mae gan y Democratiaid Rhyddfrydol 35 o gynghorwyr yng Nghaerdydd

Mae'r Democratiaid Rhyddfrydol yn hapus gyda'u perfformiad yn y ddwy ddinas fwyaf yng Nghymru.

Methiant fu ymdrech Llafur i gipio rheolaeth y cynghorau yng Nghaerdydd ac Abertawe, a'r un oedd yr hanes yn Wrecsam.

Ond daeth Llafur o fewn trwch blewyn i ail gipio Pen-y-bont ar Ogwr.

Led led Cymru roedd perfformiad y Democratiaid Rhyddfrydol yn un o gynnydd bychan, gyda 14 yn fwy o gynghorwyr nag yn 2004.

Cyn yr etholiadau roedd y Democratiaid Rhyddfrydol yn rheoli'r pedwar cyngor drwy glymblaid.

Yng Nghaerdydd, y Democratiaid Rhyddfrydol yw'r blaid fwya, ond yn parhau heb fwyafrif clir.

Prif blaid

Mae ganddyn nhw 35 o gynghorwyr allan o gyfanswm o 75. Y Ceidwadwyr yw'r ail blaid yno bellach gyda 17.

Ym Mhen-y-bont, mae gan Lafur 27 o gynghorwyr allan o gyfanswm o 54, union hanner.

Yno fe gollodd y Democratiaid Rhyddfrydol ddwy sedd, gyda Llafur yn cipio pump.

Yn Wrecsam, y Democratiaid Rhyddfrydol yw'r ail grŵp mwyaf, ar ôl y garfan annibynnol.

Mae gan y garfan 'annibynnol' 20 o seddi, y Democratiaid Rhyddfrydol 12 a Llafur 11.

Mae'r Democratiaid Rhyddfrydol yn parhau yn ail brif blaid i Lafur yn Abertawe - yno fe gipwyd tair sedd yn ychwanegol.