Etholiad: Arestio menyw

Fe fydd 'na dros 3,000 o ymgeiswyr ar gyfer dros 1,200 o seddi

Cafodd menyw 54 oed ei harestio ddydd Sadwrn gan Heddlu De Cymru mewn cysylltiad â honiadau'n ymwneud â throseddau etholiadol.

Ar ôl cael ei holi yng Ngorsaf Ganolog Abertawe fe gafodd ei rhyddhau ar fechnïaeth yr heddlu.

Mae'r heddlu yn ymchwilio i achos honedig o dwyll etholiadol mewn cysylltiad â llofnodion ffug ar bapur enwebiadau ymgeiswyr Ceidwadol yn y ddinas.

Yr wythnos ddiwetha ymddiswyddodd Norman Whitlock, ymgeisydd Ceidwadol, o'r blaid.

Deellir nad oes cysylltiad rhwng y ddau achos.

Mr Whitlock oedd yn trefnu enwebiadau nifer o ymgeiswyr Ceidwadol yn ardal Abertawe.

Dywedodd llefarydd ar ran y Blaid Geidwadol ar y pryd eu bod yn cynnal ymchwilid mewnol.

Mae Mr Whitlock yn dal yn ymgeisydd gan ei bod yn rhy hwyr yn y dydd i'w enw gael ei dynnu, ychwanegodd y llefarydd.