Cerdyn pleidleisio i fachgen 2 oed

Mae Finn Proveniers wedi bod yn cael taflenni gan ymgeiswyr

Fel arfer, mae'n rhaid aros i fod yn 18 oed cyn pleidleisio.

Ond mae Finn Proveniers o Rydaman wedi cael cerdyn pleidleisio cyn etholiadau lleol yr wythnos nesaf.

Dyflwydd oed ydi Finn.

Chwerthin oedd ymateb ei deulu, meddai ei dad, Han Proveniers.

Cafodd y cerdyn ei roi o'r neilltu pan gyrhaeddodd y cartref wythnosau yn ôl.

Ond mae Finn wedi dechrau cael taflenni oddi wrth ymgeiswyr yn gofyn am ei bleidlais ar Fai 1.

"Mater o amser fydd hi cyn i bobl ddechrau galw yn y tŷ a gofyn am siarad ag e," meddai'r tad.

Dywedodd ei fod yn credu bod y camgymeriad wedi digwydd ar ôl iddo lenwi'r ffurflen cofrestru yn Sir Gaerfyrddin pan symudodd y teulu i dŷ arall 18 mis yn ôl.

Roedd y ffurflen yn gofyn am enw pawb oedd yn byw yn y tŷ hyd yn oed os oedden nhw dan 16 oed.

"Fe roddes i flwyddyn geni Finn, Medi 2005, ac efallai bod y cyfrifiadur wedi cymryd sylw o'r ddau rif cynta ac yn meddwl ei fod e wedi cael ei eni yn 1920.

"Maen nhw'n meddwl bod Finn yn 87 oed!"

Fe ofynnwyd am sylw oddi wrth Gyngor Sir Caerfyrddin.