Beth sy'n corddi pobl Cymru?

Garry Owen
Cyflwynydd Post Cynta a Newyddion

Her o'r blaen: Cneifio defaid yn Y Bala

Llanrwst, Llangadog, Llanelli, Llangefni. Tybed sawl Llan sy yng Nghymru?

Cyn yr etholiadau lleol fe fydda i a 'nghydweithiwr i o'r Uned Wleidyddol, Owain Clarke, yn ymweld â nifer ohonyn nhw wrth fynd ar daith etholiadol O Lan i Lan.

Mae'r bag dros nos wedi ei bacio, y map yn barod, ac rwy'n ysu am ddechre'r siwrne.

Pa mor bwysig yw'r etholiadau i chi? A fyddwch chi yn bwrw pleidlais? Mae 'da fi ddigon o gwestiynau ond eich barn chi sy'n cyfri yn y pen draw.

Mae cynghorau lleol yn gyfrifol am wasanaethau eang - o addysg i lanhau'r strydoedd, o wasanaethau cymdeithasol i barciau.

Beth tybed yw eich barn chi am safon y gwasanaeth? Beth hoffech chi ei weld yn digwydd?

Angenrheidiol

Bob bore ar Radio Cymru a phob nos ar Newyddion ar S4C fe fyddwn ni'n mynd i bentre neu dre yng Nghymru lle mae'r enw yn dechre â Llan.

Sut mae paratoi ar gyfer y daith? Wel, mae angen astudio'r map ac, wrth gwrs, gael gair bach tawel gyda Rhian Haf er mwyn gweld sut dywydd fydd ar y gorwel.

LLEOLIADAU'R DAITH Ebrill 24 - Llanelwy Ebrill 25 - Llanystumdwy Ebrill 28 - Llanbrynmair Ebrill 29 - Llangyfelach Ebrill 30 - Llantrisant

Mae hynny'n allweddol, er mwyn gwybod beth i'w ddodi yn y cês.

A fydd angen cot law, het wlân a sgarff? Bydd angen fflasg, mae hynny'n si?r i chi, boed haul neu hindda.

Mae coffi'n angenrheidiol. Fel arfer, dyw'r caffis lleol ddim ar agor wrth i ni gyrraedd cyn 7am ar gyfer Post Cyntaf - ac maen nhw wedi hen gau erbyn Newyddion am 7.30pm.

Eleni mae cyfle i chi ddweud eich dweud cyn i fi hyd yn oed gyrraedd eich ardal chi.

Os oes gyda chi stori yr hoffech chi i ni ymchwilio, rhowch wybod i ni.

Tasgau

Efallai taw eich stori chi fydd yn hoelio'r sylw pan fyddwn ni'n galw heibio.

Yn ystod teithiau'r gorffennol rwy wedi cneifio defaid ger Bala a syrffio yn Abersoch.

Hyd yma does dim sôn am unrhyw dasgau o'r fath eleni ond, cofiwch, dyw hi ddim yn rhy hwyr i chi gynnig ambell awgrym.

Os oes gennych chi gwestiwn, pwnc yr hoffech ei drafod neu farn i'w lleisio, ffoniwch neu fe allwch e-bostio.

Yr e-bost ydi [e-mail] neu ffoniwch 08703 500 600.

Oriau gwaith derbyn y galwadau yw 9am-9pm, dydd Llun tan ddydd Gwener, a 10am-6pm ar benwythnosau a gwyliau banc.
Hyd at 6c y funud yw cost galwadau o linell BT (gall amrywio gyda chwmniau eraill a ffonau symudol) a bydd modd eu recordio at ddiben hyfforddi.