Rhybudd German i'r Blaid Lafur

Mike German am i'w blaid wneud mwy na chadw grym

Mae "teyrnasiad" Llafur ar gynghorau Cymru ar ben, yn ôl arweinydd y Democratiaid Rhyddfrydol yng Nghymru, Mike German.

Cyn lansio ymgyrch etholiadau lleol ei blaid ddydd Mercher, dywedodd fod y cynghorau sy'n cael eu rheoli gan y Democratiaid Rhyddfrydol yn "saffach, yn fwy gwyrdd" ac yn cynnig "gwell gwerth am arian".

Fe fydd y lansiad yng Nghasnewydd yn amlinellu uchelgais y blaid ar gyfer etholiadau Mai 1.

Dywedodd llefarydd fod y blaid "yn barod i frwydro" yn lle dim ond cadw gafael ar rym ym Mhen-y-bont, Caerdydd, Abertawe a Wrecsam.

Mae'r blaid yn arwain gweinyddiaeth leiafrifol yng Nghaerdydd.

Yn Abertawe, Wrecsam a Phen-y-bont maen nhw'n rheoli mewn clymblaid gyda phleidiau eraill.

Y Blaid Lafur oedd yn rheoli'r pedwar cyngor cyn yr etholiadau lleol diwethaf yn 2004.

Fe ddywedodd Mr German fod ei blaid yn dal i ennill tir mewn awdurdodau lleol yng Nghymru.

'Mwy gwyrdd'

"Mae teyrnasiad Llafur ar awdurdodau lleol yng Nghymru yn dod i ben," meddai.

"Ac mae'r Democratiaid Rhyddfrydol yn ymladd yn eu herbyn yn ninasoedd a threfi Cymru - ac rydyn ni'n ennill.

"Ers i ni ddechrau rheoli Caerdydd, Abertawe, Pen-y-bont a Wrecsam, rydyn ni wedi dangos ein bod ni'n gallu darparu dewis saffach, mwy gwyrdd a chynnig gwell gwerth am arian," meddai Mr German.

Mae maniffesto'r blaid, sy'n cael ei lansio ddydd Mercher, yn honni bod y Democratiaid Rhyddfrydol "ar y blaen" wrth sicrhau cymunedau saffach, darparu ailgylchu a chadw codiadau treth cyngor yn isel.

Dywedodd Mr German fod nifer cynghorwyr y Democratiaid Rhyddfrydol wedi codi 50% yn 2004.

"Rydyn ni'n ymgyrchu'n galed ar gyfer cynnydd pellach, ym mhob cyngor ym mhob rhan o Gymru," meddai.