Cymru'n cipio'r Gamp Lawn

Ryan Jones yn dathlu gyda'r tîm Cliciwch yma am adroddiad o'r gêm.

Mae miloedd o gefnogwyr yn dathlu ar ôl gweld Cymru'n cipio'r Gamp Lawn wrth guro Ffrainc o 29 pwynt i 12 yng Nghaerdydd.

Dyma ail Gamp Lawn Cymru mewn pedwar tymor a hynny llai na chwe mis ers cael eu trechu yn rownd gynta Cwpan Rygbi'r Byd gan Fiji.

Roedd 'na filoedd hefyd yn gwylio'r cyfan ar sgrin fawr yng nghanol y ddinas.

Fe wnaeth Rhodri Morgan, Prif Weinidog Cymru arwain y teyrngedau i'r tîm gan ddweud bod hyn yn "well na 2005" pan enillodd Gymru'r Gamp Lawn ddiwethaf.

Ffrainc oedd y gwrthwynebwyr yn Stadiwm y Mileniwm, tîm oedd hefyd â'r cyfle i gipio'r Bencampwriaeth.

Roedd 'na dorf o 74,609 yn y stadiwm oedd efo'r to ar gau oherwydd y glaw a miloedd mwy yn y ddinas yn gweld y crysau coch yn ennill y bencampwriaeth a'r Gamp Lawn.

Hyfforddwr balch

Wythnos ar ôl i Gymru ennill y Goron Driphlyg yn Iwerddon fe wnaeth Tywysog William, Noddwr Undeb Rygbi Cymru, gyflwyno Tlws y Bencampwriaeth i Gapten Cymru, Ryan Jones, i fonllefau o gymeradwyaeth.

Cafodd tîm Cymru eu harwain i'r maes ddydd Sadwrn gan Manon a Gwenan Gravell, merched y cyn-chwaraewr rhyngwladol Ray Gravell, oedd yn cario'r Goron Driphlyg.

Roedd hyn 30 mlynedd ers i'w tad gipio'r Gamp Lawn yn erbyn Ffrainc.

Shane Williams yn sgorio'r cais yn erbyn Ffrainc

Dyma dymor cyntaf Warren Gatland wrth y llyw.

"Mae'n rhywbeth arbennig iawn," meddai Gatland ar ôl y gêm.

"Mae'r chwaraewyr wedi cael amser anodd dros y misoedd diwethaf ond dwi'n falch o'u gweld yn cael y wobr am eu gwaith caled.

"Mae ganddyn nhw hunanhyder a dwi'n falch iawn."

Un o sêr y gêm oedd Shane Williams.

Fo gafodd gais cynta'r gêm, sy'n golygu ei fod wedi pasio'r record o'r nifer mwya o geisiau dros Gymru gyda 41.

Llwyddiant

Hefyd Williams sydd wedi sgorio'r nifer mwya o geisiau yn y bencampwriaeth eleni sef chwech.

Martin Williams gafodd y cais arall a fo gafodd ei enwi fel seren y gêm.

Dywedodd Stephen Jones, maswr Cymru, ei fod yn falch iawn o'r fuddugoliaeth ddydd Sadwrn ar ôl "siom Cwpan y Byd".

Y dorf yn Stadiwm y Mileniwm yn dathlu ennill y Gamp Lawn

"Rydym wedi llwyddo i droi pethau ac mae'n deimlad arbennig iawn."

Dywedodd Rhodri Morgan bod yr hyn y mae Warren Gatland a Shaun Edwards wedi ei wneud efo'r tîm yr un fath a'r dyddiau euraidd 30 mlynedd yn ôl.

"Fe fydd y Gamp Lawn yma yn gwneud cymaint i Gymru fel gwlad fach.

"Gallwn ddweud yn falch nawr ein bod yn bencampwyr Ewrop a phencampwyr hemisffer y gogledd."

Ar ôl y fuddugoliaeth dywedodd Rhodri Glyn Thomas, Gweinidog Chwaraeon Cymru. bod hwn yn ganlyniad gwych i Gymru.

"Dwi'n llongyfarch pawb oedd yn gysylltiedig gyda'r tîm ar eu buddugoliaeth.

"Fe ddylai pob un fod yn falch iawn o'u llwyddiant."

Un cwpl gafodd ddathliad dwbl ddydd Sadwrn yw Michelle Lewis a Matthew Edwards o Ferthyr Tudful, a oedd yn priodi cyn y gic gyntaf.

Cyfarfu'r ddau y tro diwethaf i Gymru ennill y Gamp Lawn yn 2005 wrth wylio'r gêm yn nhafarn y Llew Gwyn yn Aberdâr.