Cewri Cymru: Grav ar restr fer

Ar y rhestr fer: Ray Gravell

Enwau mawr y byd chwaraeon ac adloniant, gan gynnwys y diweddar Ray Gravell, sydd ar restr fer cystadleuaeth Cewri Cymru.

Y gantores glasurol Katherine Jenkins yw'r unig fenyw yn y deg ucha sy'n cynnwys y bariton bydenwog Bryn Terfel.

Ar y rhestr mae'r chwaraewr rygbi James Hook a chyflwynydd Blue Peter, Gethin Jones, Dewi Sant a Hywel Dda.

Comisiwn y Cynulliad Cenedlaethol sy'n trefnu'r gystadleuaeth a bydd modd pleidleisio tan fis Awst.

Bydd enw'r enillydd yn cael ei gyhoeddi yn yr Eisteddfod Genedlaethol yng Nghaerdydd.

RHESTR FER Ray Gravell Katherine Jenkins Dewi Sant Gethin Jones James Hook Joe Calzaghe Tom Jones Bryn Terfel Hywel Dda Ryan Giggs

Nod y gystadleuaeth, medd y trefnwyr, yw dod o hyd i'r person sy'n cynrychioli orau beth yw bod yn Gymro neu Gymraes.

Mae yna flychau pleidleisio yn y Senedd yng Nghaerdydd a Chanolfan Ymwelwyr Gogledd Cymru ym Mae Colwyn.

Ac mae modd pleidleisio drwy'r post.

Dechreuodd y pleidleisio ar Ionawr 31 ac eisoes mae 1,000 o bobl wedi bwrw pleidlais.

O ddydd Sadwrn ymlaen, fe fydd pobl yn gorfod pleidleisio o blaid un o'r enwau ar y rhestr fer.

Dywedodd Delyth Williams, rheolwraig marchnata y comisiwn, fod y rhestr fer yn ddifyr.

"Roedden ni am wybod pwy y mae pobl yn credu ar hyn o bryd yw'r arwr Cymreig."