Gwobor arbennig i Nigel

Nigel Owens: 'Yn codi proffeil pobol hoyw'

Roedd y dyfarnwr rygbi Nigel Owens mewn seremoni arbennig yn Llundain nos Iau.

Penderfynodd mudiad Stonewall taw fe oedd Personoliaeth Chwaraeon y Flwyddyn.

Mae'r wobor yn cydnabod unigolion sy'n codi proffeil pobol hoyw ym myd chwaraeon ac yn herio homoffobia.

Nigel, 36 oed o Bontyberem, Sir Gâr, yw'r dyn cynta hoyw agored i fod yn ddyfarnwr rygbi ar lefel ucha'r gêm.

Ym mis Hydref dyfarnodd am y tro cynta yng Nghwpan Rygbi'r Byd.

'Sioc'

Yn 2005 dyfarnodd gêm ryngwladol am y tro cynta.

Ar ôl y seremoni dywedodd Nigel, sy'n aelod o'r criw ar raglen Jonathan: "Roedd hyn yn anrhydedd, yn fraint ac yn sioc.

Ond bues i'n lwcus achos mae ffrindiau a'r teulu wedi bod yn gefnogol iawn Nigel Owens, dyfarnwr

"O'n i ddim yn disgwyl hyn o gwbwl.

"A dweud y gwir, roedd hyn fel cael 'y newis i fod yn ddyfarnwr yng Nghwpan y Byd."

Dywedodd nad oedd ei rywioldeb wedi bod yn bwnc trafod.

"Mae rhai wedi tynnu 'ngho's i ... ond mae'r hiwmor wedi helpu fi i 'ddod mas' ..."

Pan oedd yn ifancach, meddai, roedd yn anodd iddo, ddweud ei fod yn hoyw am fod y gymdeithas yn Sir Gâr yn "glos iawn".

"Ond bues i'n lwcus achos mae ffrindiau a'r teulu wedi bod yn gefnogol iawn."

'Dewr'

Dywedodd Ysgrifennydd Cymru Peter Hain: "Dwi'n ei longyfarch yn wresog.

"Mae ei batrwm ymddwyn yn ddelfrydol ar gyfer pobol ifanc sy'n ymddiddori yn y campau ...

"Ac mae ei lwyddiant a'r parch mawr iddo'n golygu ei fod yn helpu trechu'r homoffobia sy weithau'n gysylltiedig â byd y campau.

"Mae'n ddyn dewr ac wedi cyflawni llawer ym myd macho rygbi."

Roedd y seremoni yn Amgueddfa Fictoria ac Albert.