Addysg Gwynedd: Ymddiswyddiad

Bydd dogfen ymgynghorol yn cael ei chyhoeddi ddiwedd yr wythnos

Mae'r cynghorydd sydd â chyfrifoldeb am addysg ar fwrdd Cyngor Gwynedd, Penri Jones, wedi ymddiswyddo.

Ond mae wedi gwrthod dweud pam nes iddo gael cyfle i esbonio wrth ei gyd aelodau yn gynta.

Mae Cyngor Gwynedd ar hyn o bryd yn paratoi i gyhoeddi dogfen ddadleuol ar ddyfodol ysgolion cynradd yn y sir.

Nos Sul roedd yna gyfarfod brys o Fforwm Llywodraethwyr Ysgolion Llŷn i drafod y ddogfen. Maen nhw wedi galw am esboniad pam bod Penri Jones wedi ymddiswyddo.

Mae'r fforwm hefyd yn honni y bydd y ddogfen fydd yn cael ei chyhoeddi ddiwedd yr wythnos hon yn cynnwys argymhelliad i gau tair ysgol yn Llŷn, ac un chwech arall i greu dwy ysgol ffederal.

Ail ymddiswyddiad

Mewn datblygiad arall, mae'r cynghorydd Seimon Glyn wedi ymddiswyddo o weithgor gafodd ei sefydlu gan Grŵp Plaid Cymru ar y cyngor i ystyried dyfodol ysgolion bach.

Plaid Cymru yw'r blaid fwyaf ar y Cyngor.

Mae Mr Glyn honni fod penderfyniadau am ddyfodol addysg gynradd y sir yn cael eu tynnu oddi ar gynghorwyr a bod swyddogion ac uwch gynghorwyr yn gwneud y penderfyniadau.

Dywedodd y cynghorydd Richard Parry Hughes arweinydd y cyngor mai dogfen ymgynghorol fydd yn cael ei chyhoeddi ddiwedd yr wythnos ac y bydd yn sail dros drafodaethau pellach.

Mae'r cyngor wedi dweud yn gyson nad yw'n bosib parhau â'r drefn bresennol am fod nifer y disgyblion yn dal i ostwng.