Bu protest fore Iau tu allan i Neuadd y Sir
|
Mae pwyllgor cynllunio Cyngor Sir Gâr wedi gohirio penderfyniad ar gais dadleuol i godi 52 o dai ym Mhorthyrhyd yng Nghwm Gwendraeth.
Dywedodd swyddogion cynllunio fod "gwybodaeth newydd wedi dod i law oddi wrth Asiantaeth yr Amgylchedd".
Roedd y pwyllgor i fod i drafod y mater ddydd Iau. Ar hyn o bryd mae 138 o dai yn y pentre.
Daeth tua 40 i o'r pentrefwyr i Neuadd y Sir yng Nhaerfryddin i brotestio'n erbyn y cynllun.
Yn ôl y pentrefwyr, byddai'r datblygiad yn dyblu maint y pentre ac yn effeithio'n andwyol ar Gymreictod yr ardal.
Mae yna bryder bod y tir yn anaddas oherwydd y perygl o lifogydd.
Dywedodd y datblygwyr, Lovell, y byddai'r datblygiad yn cynnwys 12 o dai fforddiadwy.
Yn ôl arbenigwr ieithyddol y mae'r cyngor bro wedi ei gyflogi, fe allai canran y siaradwyr Cymraeg ostwng o 63% i 55% neu 50% oherwydd y datblygiad.
Yn gwadu
Mae Lovell yn gwadu y bydd y cynllun yn effeithio'n difrifol ar y nifer sy'n siarad Cymraeg ym Mhorthyrhyd.
Dywedodd pentrefwyr eu bod yn poeni am lifogydd ac y gallai'r datblygiad olygu mwy o bwysau ar y system garthffosiaeth.
Bydd swyddogion cynllunio yn awgrymu ddydd Mercher y dylai cynghorwyr ganiatáu'r datblygiad.
Mae'r swyddogion o blaid datblygiad graddol - 30 o dai yn cael eu codi nawr a 22 yn 2014.
Home
