Buddugoliaeth i gricedwyr pentre

Er iddo nhw guro Latvia ac Estonia, colli fu'r hanes yn erbyn tim Rwsia

Mae clwb criced pentre yn honni mai nhw ydi'r clwb cynta o'i fath o Gymru i guro dau dîm cenedlaethol.

Fe lwyddodd Clwb Criced Carmel ger Treffynnon, i guro timau cenedlaethol Estonia a Latvia yn ystod taith 10 niwrnod yn nwyrain Ewrop.

Fe wnaeth y tîm o 12 dyn chwarae yn St Petersburg a Moscow hefyd er bod tîm cenedlaethol Rwsia yn rhy dda i'r Cymry.

Dywed swyddogion y clwb eu bod fel arfer yn mynd ar daith i lefydd fel Derby a Amwythig ond roedden nhw am "fynd i rywle gwahanol" eleni.

Roedd y tim yn fuddugol yng nghystadleuaeth Helsinki

Pluen arall yn het y clwb oedd ennill cystadleuaeth chwe yr ochr Helsinki.

Nhw oedd y clwb tramor cynta ers 12 mlynedd i ennill y gystadleuaeth.

Fe guro nhw Estonia yn y gêm derfynol.

Yn ôl trefnydd y daith, Timothy Abraham, fe lwyddwyd i guro Latvia ar gêm ola'r daith a hynny ar ôl bod mewn trên am 17 awr.

"Rwy'n eitha sicr bod ein buddugoliaeth dros Latvia ac Estonia yn golygu mai ni yw'r tîm pentre cyntaf o Gymru i guro dau dîm cenedlaethol," meddai Mr Abraham.

Dywedodd fod o'n bwysig i dimau deithio i wledydd o'r fath er mwyn hyrwyddo'r gêm.

"Gobeithio yn y dyfodol y byddwn ni'n gallu estyn croeso i dimau o'r gwelydd yma i'n maes chwarae yn Pen-Y-Gelli ."