Rygbi a chrefydd yn cyd-fyw

Mae rygbi a chrefydd yn byw ochr yn ochr yn y llyfr

Nid "wimps" sy'n mynd i'r Ysgol Sul, yn ôl Ysgrifennydd Cyngor yr Ysgolion Sul.

Roedd Aled Davies yn gwneud y sylw wrth i lyfr arbennig gael ei gyhoeddi ar Faes yr Eisteddfod.

Codi'r Cwpan yw enw'r llyfryn sydd yn cynnwys rhestr o holl gemau Cwpan Rygbi'r Byd fydd yn dechrau mis nesa.

Fe fydd modd i'r plant gadw golwg ar y gemau a llenwi'r llyfr gyda'r canlyniadau.

Mae yna ychydig o hanes chwaraewyr sy'n Gristnogion ac sy'n cymryd rhan yn y bencampwriaeth hefyd.

"Mae 'na bwt am bobl fel Jason Robinson ac Adrian Davies, sy'n Gristnogion ac yn chwarae rygbi," meddai Mr Davies.

10,000 o gopïau

"Maen nhw'n dweud hefyd pa mor bwysig ydi eu ffydd a'r Beibl.

"Dim jyst wimps sy'n mynd i'r Capel a'r Ysgol Sul ond mae 'na fechgyn mawr cyhyrog fel y rhai fydd yn cymryd rhan yn y bencampwriaeth.

"Mae hyn yn dangos bod ffydd yn real."

Fe fydd 10,000 o gopïau yn cael eu dosbarthu yn rhad ac am ddim i aelodau ysgolion Sul ac ysgolion Cymru.

Er bod nifer y capeli yn lleihau dywed Mr Davies bod mwy o blant yn mynd i'r ysgol Sul.

"Ond does 'na ddim cymaint o rieni yn mynd.

"Ein her dros y blynyddoedd nesaf ydi denu'r teuluoedd cyfan yn ôl."