Dydd Llun dechreuodd y ddau ymarfer
|
Dim ond tridiau y cafodd menyw ifanc i ddysgu'r geiriau a'r alaw ar gyfer cystadleuaeth cerdd dant ond roedd hynny'n ddigon.
Roedd Owain Sion o Lwyndyrys, sy'n byw yng Nghaerdydd, yn cystadlu yn y ddeuawd Cerdd Dant dros 21 oed ddydd Iau.
Ond wrth iddo fynd i'r Eisteddfod ddydd Gwener diwethaf fe gafodd wybod fod ei gydganwr wedi tynnu'n ôl.
Felly cysylltodd â ffrindiau i chwilio am rywun a daeth Awel Mai o Gaernarfon i'r adwy.
Er nad oedd hi'n gwybod y geiriau na'r alaw fe enillodd y ddau'r gystadleuaeth.
Neges
Fe adawodd Owain neges iddi nos Wener ac fe gysylltodd hi'n ôl nos Sadwrn a dweud y byddai ganddi ddiddordeb.
Dydd Llun y cyfarfu'r ddau gyntaf i ddysgu'r geiriau a'r alaw.
 |
Roeddwn i wedi dewis peidio tynnu allan o'r gystadleuaeth gan fod hi'n bwysig cefnogi'r Eisteddfod
|
Roedd Owain yn gwybod y darn ac wedi gwneud y gosodiad ar gyfer cerdd Meirion MacIntyre Huws, Hyd yn Oed, ar gainc Siliwen gan Gwennan Pyrs.
"Fe fuon ni'n ymarfer ac yn dysgu'r gwaith drwy'r dydd Llun ar ôl i Alaw ddod draw i lle oeddwn i'n aros," meddai Owain.
"Aeth adre i Gaernarfon wedyn i ddysgu'r gwaith ddydd Mawrth cyn cael ymarfer arall efo'n gilydd ddydd Mercher.
"Fe gawson ni ymarfer bach wedyn cyn y rhagbrawf ddydd Iau."
Roedd 15 deuawd wedi cynnig enwau cyn cystadlu ond dim ond wyth oedd yn y rhagbrawf.
Cefnogaeth
"Roedd yn dipyn o sioc cael llwyfan," meddai Owain.
"Ond roedd hi'n dipyn mwy o sioc wedyn i ennill."
Roedd Awel wedi cystadlu gyda'i chwaer Elenid yn y gorffennol ond ddim wedi cystadlu am dros 10 mlynedd.
"Roeddwn i wedi dewis peidio tynnu allan o'r gystadleuaeth gan fod hi'n bwysig cefnogi'r Eisteddfod," meddai Owain, ysgrifennydd Pwyllgor Cerdd Dant Eisteddfod Caerdydd 2008.
"Y gobaith ydi petai rhai o Gaerdydd yn cystadlu yn y gogledd eleni y bydd rhai o'r gogledd yn dod i'r Steddfod flwyddyn nesa i'n cefnogi.
"Y tueddiad ydi i bobl o'r gogledd beidio cystadlu yn eisteddfodau'r de."
Hwb
Dywedodd ei fod e fel nifer fu'n cystadlu yn y gorffennol wedi derbyn llythyr gan Aled Lloyd Davies yn eu hannog i gystadlu.
"Mae cystadlaethau cerdd dant wedi bod yn dda iawn a nifer wedi cystadlu, o bosib oherwydd llythyr Aled," meddai Owain.
"Roedd nifer o bobl wedi dod yn ôl at ei gilydd ar gyfer cystadleuaeth y ddeuawd."
Dywedodd fod Awel yn falch ei fod wedi gofyn iddi am help.
"Gobeithio y gallwn ni gario mlaen gyda'r ddeuawd."
Home
