Archdderwydd: Am ehangu apêl y Brifwyl
|
Mae Gorsedd Y Beirdd wedi cadarnhau mai Dic yr Hendre (Dic Jones) fydd yn olynu Selwyn Iolen fel Archdderwydd Cymru.
Dim ond un enw oedd wedi dod i law yn gynharach eleni.
Fe yw'r ffermwr cyntaf i fod yn Archdderwydd.
Roedd Selwyn Iolen wedi dweud yn ystod Seremoni Gyhoeddi Eisteddfod Caerdydd mai Dic Jones fyddai yn ei olynu.
Enillodd y ffermwr wedi ymddeol o Flaenannerch, Ceredigion, Gadair Eisteddfod Genedlaethol 1966 am ei awdl Y Cynhaeaf.
Er nad yw wedi ennill cadair ers hynny dywedodd nad oedd yn diystyru'r posibilrwydd.
Mae'r rheolau yn caniatáu i'r Archdderwydd ymgeisio.
'Ymylon'
Yn 1976 collodd y cyfle i gael ail Gadair pan gafodd ei feirniadu am dorri rheolau sef cystadlu pan oedd ar y Pwyllgor Llên.
Dywedodd ei fod am ehangu apêl y Brifwyl - i fwy o bobl "ar yr ymylon".
Dywedodd y byddai'n dymuno gweld mwy o bobl sy'n mynd i'r Sioe Fawr yn ymweld â'r Eisteddfod.
"Wrth fynd i'r Sioe Amaethyddol, dwi'n teimlo bod 'na groesdoriad ehangach o Gymry yno - yn bobl y wlad a'r dre.
"Hoffwn ddod â'r ddau draddodiad yn nes, tynhau efallai ond mae angen trwch mawr o'r boblogaeth tu ôl i ni.
Symud ymlaen
Dywedodd fod yr Orsedd yn datblygu drwy'r amser - er bod angen cadw'r traddodiadau roedd angen symud ymlaen hefyd, meddai.
"Mae'n braf gweld pobl ifanc, enillwyr yr Urdd yn cael eu hurddo ac mae hyn yn gam i'r cyfeiriad cywir," meddai.
"Efallai y bydd yn bosib ymestyn hyn i'n dysgwyr yn y dyfodol."
Home
