'Ymateb positif': Cylchgawn newydd
|
Mae cylchgrawn Cymraeg sy'n annog pobol i barchu'r ddaear newydd gael ei gyhoeddi.
Roedd Y Papur Gwyrdd ar werth am y tro cyntaf ar Faes yr Eisteddfod.
Menter annibynnol y cyn newyddiadurwr a darlledwr Hywel Davies yw hon, cyn-olygydd papur wythnosol y Merthyr Express.
Dywedodd wrth lansio'r papur fod angen "bod yn greadigol i wneud yr hyn sy'n dda er mwyn goroesi problemau'r byd".
Roedd Cyfeillion y Ddaear a WWF Cymru wedi bod yn bositif, meddai.
"Mae'r ymateb wedi bod yn frwdfrydig a dwi'n ddiolchgar am hynny."
'Herio'
Roedd bod barn gwyddonwyr a sefydliadau yn llethu'r darllenydd oherwydd rhybuddion am yr hinsawdd, meddai, ac roedd angen creu cyswllt rhwng hyn â bywyd bob dydd.
"Os na wnawn ni herio'n ffordd o fyw mae perygl y bydd y dewis ym mynd mas o reolaeth.
"Mae hwn yn bwnc canolog i'n bywydau i gyd.
"Dyw hwn ddim yn bwnc sy'n cael ei weld fel rhywbeth Cymraeg a Chymreig ac mae cyhoeddi'r cylchgrawn yn Gymraeg yn dod â'r cyfan yn nes i'n bywydau bob dydd.
'Gweithredu'
"Mae'n hwyr iawn yn y dydd ac mae'n rhaid gweithredu."
Dywedodd ei fod yn ymwybodol o'r cylchgronau Saesneg am y pwnc a'i fod am gyhoeddi rhywbeth Cymraeg fyddai'n apelio at drwch y boblogaeth a denu darllenwyr nad oedd yn arfer darllen Cymraeg.
Mae Gordon James o Gyfeillion y Ddaear, un o gyfranwyr y rhifyn cyntaf, wedi croesawu'r cyhoeddiad.
"Yn ein swyddfa ni mae 'na drafodaeth wedi bod, bod mudiadau amgylcheddol yng Nghymru yn cael eu hystyried yn rhywbeth Seisnig.
"Fe fydd y papur hwn yn tanlinellu bod yr amgylchedd yn rhywbeth i bawb."
Pris y cylchgrawn yw £1 ac yn cael ei gyhoeddi bob dau fis.
Mae ar gael ym Mhabell Cyfeillion y Ddaear a Chyngor Llyfrau Cymru yn ystod wythnos yr Eisteddfod ac yna mewn siopau llyfrau.
Home
