Siswrn yn torri trwyddo

Dywed y beirniaid fod y siop yn chwarae rôl allweddol yn y gymuned leol

Cafodd un o fusnesau tref Yr Wyddgrug wobr am hyrwyddo'r Gymraeg mewn seremoni ar Faes yr Eisteddfod ddydd Llun.

Mae Siop y Siswrn yn siop lyfrau a chrefftau Cymraeg yn y dref a nhw enillodd Wobr Bro'r Eisteddfod mewn seremoni Gwobrau Menter a Busnes.

Cafodd pum busnes wobrau, y pump yn cael eu rhedeg gan Gymry Cymraeg.

Yn ôl Menter a Busnes mae'r gwobrau yn "cydnabod llwyddiant y busnesau i hyrwyddo'r Gymraeg a'u cyfraniad i'w heconomi leol neu genedlaethol".

Defnyddio'r Gymraeg

Rhodri Glyn Thomas, y Gweinidog dros Dreftadaeth, oedd yn cyflwyno'r gwobrau.

Mae Siop y Siswrn wedi chwarae rôl allweddol yn nhrefniadau'r Eisteddfod eleni ac wrth hyrwyddo'r Gymraeg yn lleol.

"Mae'n deimlad o anrhydedd i dderbyn y wobr ar garreg y drws," meddai Selwyn Evans, un o gydberchnogion Siop y Siswrn.

"Ond mae'r diolch ar ddiwedd y dydd yn mynd i'n cwsmeriaid ar hyd y blynyddoedd."

Fe sefydlwyd y siop yn 1973 ac mae Ann a Selwyn Evans wedi bod yno ers 1986.

Mae'r diolch ar ddiwedd y dydd yn mynd i'n cwsmeriaid ar hyd y blynyddoedd Selwyn Evans

Fe aeth y brif wobr i gwmni arall sy'n ymwneud â llyfrau, Gwasg Gomer o Landysul.

Cafodd y wasg, sydd bellach yn nwylo'r bedwaredd genhedlaeth o deulu'r Lewisiaid, wobr Menter Cenedlaethol.

Gwasg Gomer ydi un o brif gyhoeddwyr llyfrau yng Nghymru ac maen nhw'n dal i fentro.

Mae'r cwmni'n cyflogi 64 o bobl yn Llandysul.

Cwmni Cerrig o Bwllheli dderbyniodd y Wobr Ardal.

Mae'r cwmni yn cyflogi 30 ac yn defnyddio sgiliau a deunyddiau traddodiadol i gynnig cynnyrch gwenithfaen, llechen a marmor o safon uchel.

Siop trin gwallt o Lanbedr Pont Steffan, Dere i Dorri, gafodd Wobr Menter Pobl Ifanc ac maen nhw'n ehangu'r busnes i gynnig therapi harddwch ar ôl symud i safle yng nghanol y dref.

'Manteision'

Ac fe aeth Gwobr Menter Twristiaeth i Fwyty'r Celtic o Aberaeron.

Mae'r cwmni wedi cael wyneb cyhoeddus dwyieithog i'r busnes yn ddiweddar ac ar eu hanterth mae'n cyflogi 27 o staff llawn amser a rhan amser.

"Mae mwy a mwy o fusnesau yn cydnabod manteision defnyddio'r Gymraeg ac mae pob un o'r 125 enwebiad ar gyfer y gwobrau eleni yn gwneud cyfraniad pwysig i economi Cymru," meddai Alun Jones, Prif Weithredwr Menter a Busnes.

"Mae cyflwyno'r gwobrau ar lwyfan yr Eisteddfod hefyd yn dangos y gall Cymru ddathlu cyflawniadau ein hentrepreneuriaid llwyddiannus yn ogystal â'n beirdd a'n cerddorion."

Cafodd y gwobrau eu noddi gan Menter a Busnes, yr Eisteddfod, Croeso Cymru, West Coast Energy gyda chefnogaeth gan Tinopolis, Golwg a'r Daily Post.