Mae'r pecynnau diweddara yn ehangu'r ddarpariaeth Gymraeg sydd ar gael
|
Mae partneriaeth rhwng Bwrdd yr Iaith Gymraeg a Microsoft yn parhau.
O ganlyniad fe fydd modd lawrlwytho rhyngwyneb iaith i Windows Vista ac Office 2007 yn rhad ac am ddim ymhen chwe mis.
Fe gychwynnodd y berthynas wrth lansio pecynnau rhyngwyneb iaith i Office 2003 a Windows XP tair blynedd yn ôl.
Mae buddsoddiad Microsoft i ddatblygu meddalwedd yn Gymraeg yn mynd law yn llaw ag ymdrechion y Bwrdd i wneud y Gymraeg yn rhan naturiol o fywyd pob dydd a'i bod yn berthnasol yn y byd technegol.
"Mae Microsoft wedi ymrwymo i sicrhau bod ein meddalwedd ar gael i bawb, mewn nifer o wahanol ieithoedd," meddai Stuart Aston, rheolwr rhaglenni llywodraethol Microsoft.
"Mae'n partneriaeth gyda'r Bwrdd yn caniatáu i bobl weithio'n haws yn eu dewis iaith, p'un a ydynt yn y cartref, ym myd busnes neu yn y system addysg."
Dywedodd Meirion Prys Jones, Prif Weithredwr Bwrdd yr Iaith Gymraeg: "Rydym yn arbennig o falch i fod yn gweithio mewn partneriaeth â Microsoft o'r newydd, a hynny er mwyn datblygu offeryn i siaradwyr Cymraeg ei ddefnyddio yn eu bywydau bob dydd.
"Mae'n profi bod y Gymraeg, fel technoleg gwybodaeth, yn treiddio i bob agwedd ar fywyd cyfoes yng Nghymru."
Home
