Tirlun lleol ar gadair prifwyl

Cafodd Cadair yr Eisteddfod ei chyflwyno nos Fercher

Cafodd Cadair Eisteddfod Sir Fflint a'r Cyffiniau ei chyflwyno mewn seremoni yn Yr Wyddgrug nos Fercher.

Mae'r gadair eleni yn cael ei chyflwyno gan gwmni Siop y Siswrn yn Yr Wyddgrug.

Tad a mab lleol, Graham ac Ian Pickstock, sydd wedi dylunio a gwneud y gadair ac arni mae tirlun yr ardal sydd wedi eu hysbrydoli.

Ar gefn y gadair mae Moel Famau a Bryniau Clwyd.

"Mae'r dyluniad yn cynrychioli Moel Famau a Bryniau Clwyd - ar y brig mae Moel Famau ac yna'r bryniau oddi tano cyn cyrraedd Afon Dyfrdwy," meddai Ian aeth i Ysgol Maes Garmon yn Yr Wyddgrug.

Anrhydedd

"Daw'r coed, onnen a derw, yn lleol o stad Mostyn.

"Mae hi'n gadair gyfoes a dwi wedi mwynhau ei gwneud ac mae hi wedi bod yn anrhydedd."

Dywedodd Selwyn Evans, un o berchnogion Siop y Siswrn, ei bod yn anrhydedd iddo fo, ei wraig Ann a'u merch 11 oed Lisa Rhiannon, gael cyflwyno'r Gadair eleni.

Cyfle i ni roi rhywbeth yn ôl i'r gymuned leol am yr holl gefnogaeth 'dan ni wedi ei chael dros y blynyddoedd Selwyn Evans, Siop y Siswrn

"Mae'n bwysig ac yn anrhydedd i gwmni bach o fewn y sir i gael y cyfle i fod yn rhan o ŵyl mor bwysig â Gŵyl mor fawr, un o'r gwyliau diwylliannol mwyaf yn Ewrop.

"Yn ganolbwynt i'r sir mae Moel Famau a Bryniau Clwyd ac mae hynny'n ganolbwynt i gynllun y gadair.

"Mae'n fraint cyflwyno'r Gadair eleni, cyfle i ni roi rhywbeth yn ôl i'r gymuned leol am yr holl gefnogaeth 'dan ni wedi ei chael dros y blynyddoedd gan y Cymry Cymraeg a'r di-Gymraeg."

'Dyn cyffredin'

Wrth gyflwyno'r Gadair dyfynnodd Mr Evans eiriau'r nofelydd o'r dref, Daniel Owen, "Nid i'r doeth a'r deallus yr ysgrifennais ond i'r dyn cyffredin".

"Fe awgrymes i fod yr Eisteddfod wedi cael y 'doeth a'r deallus' wrth dderbyn y Goron gan ddau o brif sefydliadau Cymru - Yr Amgueddfa a'r Llyfrgell Genedlaethol - a rwan efo'r dyn cyffredin yn cael y gadair."

Rhoddwyr a gwneuthurwyr y Gadair

Mae Mr Evans yn gadeirydd pwyllgor cyllid lleol yr Eisteddfod.

"O safbwynt y siopau, mae yna groeso brwd i'r Eisteddfod," meddai.

"Mae'r 15 i 18 mis diwetha yn brawf bod yna groeso brwd ar hyd y sir a'r ffaith fod y gronfa leol eisoes wedi cyrraedd y nod."

Fe fydd y Gadair yn cael ei chyflwyno i'r prifardd buddugol am awdl mewn cynghanedd gyflawn heb fod dros 200 llinell ar y testun Ffin.

Mae saith ymgais wedi dod i law a bydd rhaid aros tan y cadeirio ar Awst 10 i weld a fydd teilyngdod.

Mwy am Gadair Moel Famau