Ceidwadwyr Cymru yn dathlu

Bydd gan y Ceidwadwyr bump o aelodau yn cynrychioli seddi etholaethol yn y cynulliad newydd.

Mynwy oedd eu hunig sedd etholaethol yn yr hen gynulliad.

Bydd eu haelodau newydd yn cynrychioli Gogledd Caerdydd, Gorllewin Clwyd, Preseli Penfro, a Gorllewin Caerfyrddin a De Penfro yn ogystal â Mynwy.

Mae'r blaid yn disgwyl ychwanegu aelodau rhanbarthol at eu cyfanswm terfynol.

Yng Ngorllewin Clwyd cafodd Alun Pugh yr Ysgrifennydd Chwaraeon, Diwylliant a'r Iaith Gymraeg ei drechu gan Darren Millar. Y Ceidwadwyr yn sicrhau mwyafrif o 1,596.

Mewn ras glos rhwng y tair plaid yng Ngorllewin Caerfyrddin a De Penfro, y Ceidwadwr oedd yn fuddugol o 98 pleidlais.

Cafodd Angela Burns 8,590 o bleidleisiau, gan drechu Christine Gwyther, Llafur ( 8,492) a John Dixon, Plaid Cymru (8,340).

Jonathan Morgan ydi aelod newydd Gogledd Caerdydd. Roedd ganddo fwyafrif o 4,844 dros Lafur.

Roedd Ceidwadwyr Preseli Penfro hefyd yn dathlu wrth i Paul Davies sicrhau mwyafrif o 3,205.