Plaid Cymru'n cipio Llanelli

Helen Mary Jones yn adennill sedd Llanelli

Llwyddodd Helen Mary Jones o Blaid Cymru i droi mwyafrif Llafur o 21 pleidlais gan adennill y sedd a gollodd bedair blynedd yn ôl.

Fe wnaeth Ms Jones, a fu'n aelod rhanbarth Canolbarth a Gorllewin Cymru, guro'r aelod Llafur, Catherine Thomas, gyda mwyafrif o 3,884 pleidlais.

Penderfynodd Ms Jones i sefyll yn yr etholaeth yn hytrach nag ar y rhestr.

Roedd Plaid Cymru wedi cynnal ymgyrch gref yn Llanelli, un o'r pum sedd allweddol y gwnaethon nhw eu colli yn etholiad 2003.

Bu Ms Jones yn cynrychioli Llanelli yn ystod y cynulliad cyntaf tan 2003.

Mae hi'n llefarydd iechyd y blaid.

Wrth gael ei holi cyn y canlyniad swyddogol fe wnaeth Nia Griffith, AS Llafur Llanelli, gydnabod y byddai Plaid Cymru yn ennill.

"Rydym wedi gweld y Democratiaid Rhyddfrydol a'r Ceidwadwyr yn colli pleidleisiau i Blaid Cymru.

"Mae'r bobl wedi defnyddio'r bleidlais yn strategol ac yn erbyn Llafur.

"Mae'n drist iawn i fod yn onest ond mae Llafur yn rheoli'r cyngor, yn y Cynulliad ac yn Llundain a'r etholwyr yn cwyno yn erbyn y blaid honno."

Dywedodd bod yr ysbyty lleol yn un mater sydd wedi bod yn bwysig iawn i'r etholwyr.